Հայաստանը Forbes-ի՝ բիզնես վարելու համար լավագույն երկրների ցուցակում

Forbes  ամսագիրը  հրապարակել է բիզնես վարելու համար լավագույն երկրների (Best Countries for Business)  2019 թվականի  վարկանշային աղյուսակը։ Ռիա նովոստիի հաղորդմամբ, ամսագիրը նշել է, որ նույնիսկ Brexit-ի մշուշոտ ապագան չի խանգարել Մեծ Բրիտանիային գլխավորել ցուցակը։ Ցանկում ընդգրկված է 161 երկիր:

Երկրորդ տեղում է  Շվեդիան, այնուհետև՝ Հոնկոնգ, Նիդեռլանդները, Նոր Զելանդիան, Կանադան, Դանիան, Սինգապուրը, Ավստրալիան, Շվեյցարիան:

Հայաստանն աղյուսակում 81-րդն է ՀՆԱ-ի ցուցանիշի 7,5 տոկոս աճով, իսկ ՀՆԱ-ն բնակչության մեկ շնչի հաշվով կազմում է 3900 դոլար:

Ռուսաստանը ցուցակում 55-րդ տեղում է։ Հայաստանի հարևան երկրներից Վրաստանը 44-րդ տեղում  է, Թուրքիան՝ 57-րդ, Ադրբեջանը՝ 70-րդ։

Ցուցակը կազմելիս հաշվի է առնվել 15 տարբեր ցուցանիշներ՝ սեփականության իրավունքի պաշտպանություն, նորարարություն, հարկեր, տեխնոլոգիաներ, կոռուպցիա, շուկայի չափ, քաղաքական ռիսկեր, կենսամակարդակ, աշխատուժի որակ,  առևտրային և  ֆինանսական ազատություն, բյուրոկրատիայի մակարդակ, ներդրումային պաշտպանություն։