Թերեզա Մեյի խայտառակ պարտությունը. Բրիտանիայի խորհրդարանը մերժեց «Բրեքսիթի» գործարքը

Մեծ Բրիտանիայի վարչապետ Թերեզա Մեյն արժանացավ վատագույն պարտության խորհրդարանական երկրի պատմության մեջ. Բրիտանիայի խորհրդարանի ստորին պալատը մերժեց վարչապետի ներկայացրած ԵՄ-ից դուրս գալու կամ Բրեքսիթի գործարքը։

Պատգամավորները գործարքը մերժեցին 432 դեմ, 202 կողմ ձայներով, որը պետք է կարգավորեր 2019թ.-ի մարտի 29-ին Բրիտանիայի ԵՄ-ից դուրս գալու պայմանները։

Քվեարկությունից հետո լեյբորիստական կուսակցության ղեկավար Ջերեմի Գորբինը հանդես է եկել կառավարությանն անվստահություն հայտնելու նախաձեռնությամբ, որը կարող է հանգեցնել համընդհանուր ընտրությունների։

Կառավարությանն անվստահության քվեարկությունը նախատեսվում է, որ տեղի կունենա այսօր՝ Բրիտանիայի ժամանակով 19.00-ին։

Այս պարտությունը մեծ հարված էր Թերեզա Մեյի համար, ով ավելի քան 2 տարի անցկացրեց ԵՄ-ի հետ գործարքի կնքման համար։

Ծրագիրը նախատեսում էր ԵՄ-ից դուրս գալը մարտի 29-ին ու 21 ամսով անցումային շրջանի հաստատում, որի ընթացքում էլ պետք է բանակցվեր ազատ առևտրի գործարքը։

Այս քվեարկությունը ի սկզբանե նախատեսված էր դեկտեմբերին, սակայն վարչապետն այն հետաձգեց, որպեսզի կարողանար ստանալ պատգամավորների աջակցությունը։

Գործարքի մերժումը հարցականի տակ է դնում  Բրեքսիթի ապագան ու ժամանակահատվածը։
Ինչպես գրում է BBC-ն, այն պատգամավորները, որոնք ցանկանում են կամ նոր հանրաքվե կամ դուրս գալ առանց գործարքի, այժմ արդեն կուժեղացնեն իրենց ջանքերն այդ ուղղությամբ, քանի որ թուլացած վարչապետն առաջարկել է լսել նրանց փաստարկները։

Բրիտանիայում հաջորդ համընդհանուր ընտրությունները նախատեսված են 2022թ.-ին, սակայն եթե խորհրդարանն անվստահություն հայտնի կառավարությանը, ապա կսկսվի կառավարության 14-օրյա հետհաշվարկն ու նոր ընտրություններ։

ԵՄ խորհրդի նախագահ Դոնալդ Տուսկը գործարքի մերժումից հետո թվիթերում գրել է.«Եթե գործարքն անհնարին է և ոչ ոք չի ցանկանում գործարք, ապա ո՞վ վերջապես քաջություն կունենա ասելու, թե որն է միակ դրական լուծումը»։