Դատարանը Ռոբերտ Քոչարյանի կալանքի դեմ պաշտպանների բողոքի վերաբերյալ որոշումը կհրապարակի վաղը

«Դատարանի որոշումը կհրապարակվի վաղը ժամը 12։30-ին»,-լրագրողների հետ զրույցում տեղեկացրեց ՀՀ երկրոդ նախագահ Ռոբերտ Քոչարյանի պաշտպանական խմբի անդամ Հայկ Ալումյանը։

Նա ասաց, այսօրվա նիստի ընթացքում ելույթ է ունեցել Ռոբերտ Քոչարյանը։

«Շատ երկար ու մանրամասն ելույթ ունեցավ, նկարագրեց իրադարձությունները։ Նա ներկայացրեց, թե ինչ հանգամանքներ են եղել 2008 թվականի ընտրություններից հետո և ինչ ինչպես են իրադարձությունները զարգացել և ինչն է պատճառ հանդիսացել արտակարգ դրություն մտցնելու համար»,-ասաց պաշտպանը։

Հիշեցնենք, որ մարտի 15-ին առաջին ատյանի դատարանը բավարարել էր Հատուկ քննչական ծառայության միջնորդությունը՝ Ռոբերտ Քոչարյանի նկատմամբ ընտրված խափանման միջոց կալանավորման ժամանակը ևս երկու ամսով երկարացնելու վերաբերյալ:

Միաժամանակ դատարանը մերժել էր պաշտպանական խմբի կողմից գրավը թույլատրելի ճանաչելու վերաբերյալ միջնորդությունը: Դատարանը հիշյալ որոշմամբ արձանագրել էր նաև, որ Ռոբերտ Քոչարյանին առաջադրված կաշառքի դրվագով հիմնավոր կասկածը բացակայում է: Առաջին ատյանի դատարանի այս որոշումը Ռոբերտ Քոչարյանի պաշտպանական խումբը բողոքարկել է Վերաքննիչ դատարան: