Բարեղամ Հարությունյան. Ցանկացած դժվարություն հաղթահարելի է

Մինսկում շարունակվող 2-րդ Եվրոպական խաղերում Հայաստանի եւս մեկ ներկայացուցիչ հաղթահարեց բռնցքամարտի մրցաշարի 1/8 եզրափակչի արգելքը։

52 կգ քաշային Բարեղամ Հարությունյանը 4։1 հաշվով առավելության հասավ Բելառուսի ներկայացուցիչ Էմիլ Ալիևի նկատմամբ:

Մենամարտից հետո հայ բռնցքամարտիկը ՀԱՕԿ լրատվականի հետ զրույցում մեկնաբանեց հաղթանակը:

«Շատ ծանր մենամարտ ստացվեց, բայց հաջորդը կլինի ավելի լավը։ Դժվար էր Մինսկում մենամարտել երկրպագուների աջակցության ներքո հանդես եկող բելառուս մարզիկի հետ, բայց ցանկացած դժվարություն հաղթահարելու համար է»,- ասաց Բարեղամ Հարությունյանը:

Քառորդ եզրափակչում Բարեղամ Հարությունյանի մրցակիցը կլինի իսպանացի Գաբրիել Էսկոբարը։