Թուրքմենստանի քաղաքացիներին ձերբակալում են նախագահի մահվան մասին խոսելու համար

Թուրքմենստանի առնվազն երեք քաղաքացի է ձերբակալվել  նախագահ Գուրբանգուլի Բերդիմուհամեդովի մահվան մասին լուրեր տարածելու մեղադրանքով։ news.mail.ru-ի հաղորդմամբ, այս մասին գրել է թուրքմենական լրտավամիջոցը։

Ուժային կառույցները երկրի մայրաքաղաք Աշխաբադում և շրջաններում անցել են ուժեղացված ծառայության՝ պայքարելով  պետության ղեկավարի մահվան կամ վատ առողջության մասին կեղծ տեղեկությունների դեմ։

«Երկրում իրավիճակի ապակայունացմանը նպաստող լուրերի»  տարածման համար ձերբակալվել է «Թուրքմենթելեկոմի» մասնաճյուղերից մեկի աշխատակից, ջրային տնտեսության աշխատակից ու համատիրության աշխատակցուհի։

Հիշեցնենք, որ Գուրբանգուլի Բերդիմուհամեդովի մահվան մասին լուրեր էին տարածվել հուլիսի 20-ին։ Այնուհետև «մահվան» լուրը տարածած քաղաքագետը ներողություն էր խնդրել և հայտնել, որ Բերդիմուհամեդովի մահվան մասին տեղեկատվությունը չի հաստատվել։

Հուլիսի 25-ին Թուրքմենաստանի նախագահը իր մահվան մասին լուրերից հետո առաջին անգամ հայտնվել էլ  տեսախցիկների առջև։ Նաև երկրի ղեկավարի մամուլի ծառայությունից հայտնել էին, որ Գուրբանգուլի Բերդիմուհամեդովը հեռախոսազրույց է ունեցել Ուզբեկստանի նախագահի հետ՝ շնորհավորելով նրան  ծննդյան առիթով։