Նազելի Վարդանյան. Մինչև օրս չգիտենք, թե Ամուլսարի շահագործումը մարդու առողջության վրա ինչ ազդեցություն կունենա

Ամուլսարի շահագործման թույլտվությունը՝ շրջակա միջավայրի վրա ազդեցության գնահատման և փորձաքննական եզրակացությունը, տրվել են օրենքների խախտումներով։ Լրագրողների հետ հանդիպմանն ասաց բնապահպան-իրավաբան Նազելի Վարդանյանը։ Նա նշեց, որ խախտվել է ՀՀ Սահմանադրությունը, Ջրային, Հողային օրենսգրքերը Սևանա լճի մասին, Հատուկ պահպանվող տարածքների, Կենդանական, Բուսական աշխարհների մասին և այլ օրենքներ, ինչես նաև միջազգային 10 կոնվենցիա, որոնք վավերեցված են ՀՀ կողմից և պարտավորություններ ունի միջազգային հանրության առջև։

«Կառավարությանը ներկայացրել եմ այդ բոլոր օրենքները, կոնվենցիաները, նշել եմ, թե ինչ կոռուպցիոն հանգամանքներ կան, խնդրել եմ իրավապահներին ուսումնասիրել, գործեր հարուցել,  քննել, սակայն մինչ օրս  որևէ բան չի արվել։ Մի կասկածելի, անհասկանալի հոդվածով, հիմքերով քրեական գործ է հարուցվել, այդպես էլ չենք հասկանում ինչ ճակատագրի է արժանանալու»,- ասաց Ն. Վարդանյանը։

Նա նշեց, որ վարչապետի հետ հանդիպմանը հարցրել է, թե արդյոք «Էլարդի» ուսումնասիրության վրա հնարավոր չէ  չշահագործել հանքը, Ն. Փաշինյանը պատասխանել է, որ գործում կա 35 հազար փաստաթուղթ։  Ն. Վարդանյանը նաև հետաքրքրվել է, թե այդ դեպքում 35 հազար փասաթղթի վրա հնարավոր չէր կարճել գործը, և 400 հազար  դոլար չծախսել նոր փորձաքննության համար։

«Ստացվում է, որ 35 հազար փաստաթուղթն ու «Էլարդի» ուսումնասիրությունը չի օգնում, որ գործը կարճվի»,- ասաց բնապահպան-իրավաբանը։ 

Նա նաև հայտարարեց, որ համաձայն սանիտարահամաճարակային անվտանգության մասին ՀՀ օրենքի, այսպիսի ծրագրերը պետք է անցեն սանիտարական փորձաքննություն, որն իրականացնում է առողջապահության նախարարությունը, այսինքն  մարդու առողջության վրա  ազդեցությունը չի գնահատվել։

«Մինչև օրս չգիտենք, թե մարդու առողջության վրա ինչ ազդեցություն կունենա այս ծրագիրը»,- ընդգծեց նա։

Ասուլիսին ներկա աշխարհագրագետ,  Հայկական բնապահպանական ճակատի անդամ Լևոն Գալստյանն ասաց, որ չի իրականացվել ծրագրի իրագործման դեպքում Ջերմուկի վրա սոցիալ- տնտեսական ազդեցության գնահատում։ Նա համոզված է, որ եթե հանքը շահագործվի, Ջերմուկը կորցնելու է իր առողջարանային  բրենդի ողջ հնարավորությունները։ Լ. Գալստյանը  նշեց, որ «Էլարդի» փաստաթուղթը՝ հայերեն թարգմանությամբ, 250 էջ է, որում կասկածելի բառը կրկնվում է 12 անգամ, թերի՝ 59, սխալ՝ 60, մտահոգ՝ 30, անվստահելի՝  7, անորոշ՝ 34, թերություն՝ 18, վատ՝ 11, անբավարար՝ 14, չի կատարվել՝  4 անգամ։

«Այսպիսի պարունակություն ունեցող փաստաթղթից հետո եզրակացնել, որ այս հանքավայրն այս վիճակում կարելի է շահագործել, դա բոլոր տեսակի տրամաբանությունից դուրս է»,- ասաց նա։

Լ. Գալստյանի խոսքով, պետք է իրավական գնահատան տալ Քննչական կոմիտեով ստղծված խմբի աշխատանքներին։