Ամենից շատ կարդացված նյութեր
.jpg "Համանախագահներն ընդգծում են բռնությունները նվազագույնի հասցնելու կողմերի ջանքերի դրական հետևանքները")
Համանախագահներն ընդգծում են բռնությունները նվազագույնի հասցնելու կողմերի ջանքերի դրական հետևանքները
ԵԱՀԿ Մինսկի խմբի համանախագահները Իգոր Պոպովը՝ ՌԴ, Ստեֆան Վիսկոնտին՝ Ֆրանսիա, և Էնդրյու Շոֆերը՝ ԱՄՆ, ՄԱԿ-ի Գլխավոր ասամբլեայի շրջանակներում Ադրբեջանի արտգործնախարար Էլմար Մամեդյարովի և Հայաստանի արտգործնախարար Զոհրաբ Մնացականյանի հետ առանձին և համատեղ հանդիպումներից հետո հանդես են եկել հայտարարությամբ։
Համանախագահների հանդիպումներին մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպշիկը: Նրանք հանդիպել են նաև ԵԱՀԿ գլխավոր քարտուղար Թոմաս Գրեմինգերին, ԵԱՀԿ գործող նախագահին, Սլովակիայի արտգործնախարար Միրոսլավ Լայչակին և ՄԱԿ-ի բարձրաստիճան պաշտոնյաներին:
Հայտարարության մեջ ասվում է, որ համանախագահները երկու նախարարներին ներկայացրել են իրենց գործունեությունը՝ հունիսին Վաշինգտոնում անցկացվող համատեղ հանդիպումից ի վեր, այդ թվում նաև Փարիզում և Ժնևում անցկացված վերջին խորհրդակցությունները՝ հակամարտության հումանիտար և անվտանգության հարթություններում:
Համանախագահները նշել են ամառվա ժամանակահատվածում բռնությունները նվազագույնի հասցնելու կողմերի ջանքերի դրական հետևանքները, ներառյալ առկա ուղիղ հաղորդակցական կապերի օգտագործումը և խոր ափսոսանք հայտնել վերջին մահվան դեպքի կապակցությամբ:
Համանախագահները և նախարարները շարունակել են լարվածությունը նվազեցնելու և խաղաղության համար նպաստող մթնոլորտի պահպանման և բովանդակային բանակցություններին նպաստող լրացուցիչ միջոցառումների վերաբերյալ քննարկումները:
Վկայակոչելով իրենց՝ մարտի 9-ի հայտարարությունը, համանախագահները կողմերին կոչ են արել նվազագույնի հասցնել այնպիսի հռետորաբանության օգտագործումը, որը բորբոքող է կամ կանխակալ բանակցությունների արդյունքի համար:
Նշվում է, որ համանախագահները մտադիր են մոտ ապագայում այցելել տարածաշրջան:
Studio One