Հայ աշակերտներն ունեն բավարար գիտելիքներ նորարարություններ ներկայացնելու համար. Արայիկ Հարությունյան

Հայ աշակերտներն ունեն բավարար գիտելիքներ նորարարություններ ներկայացնելու համար։ Այս մասին այսօր Երևանի Կարեն Դեմիրճյանի անվան մարզահամերգային համալիրում ընթացող WCIT-2019 տեղեկատվական տեխնոլոգիաների համաշխարհային համաժողովի ժամանակ լրագրողների հետ զրույցում ասաց ՀՀ կրթության, գիտության, մշակույթի և սպորտի նախարար Արայիկ Հարությունյանը՝ պատասխանելով հարցին, թե երբ աշակերտները կունենան 21-րդ դարին հատուկ կրթություն։ 

Սակայն, ըստ նախարարի, դա բավարար չէ և կարծում է, որ պետք է զարգացվի ընդհանուր հանրակրթական համակարգը։

Արայիկ Հարությունյանն ասաց, որ այս տարվա ընթացքում արդեն իսկ ծրագրեր են իրականացնում, և դպրոցների շուրջ 50%-ը կունենան ինժեներական լաբորատորիաներ, ինչը միջնաժամկետ կտրվածքով հսկայական ազդեցություն է ունենալու կրթական ոլորտի վրա:

Նրա խոսքով՝  հաջորդ տարի ջանքեր կգործադրեն, որպեսզի նման լաբորատորիաներ ունենան մնացած 50 տոկոս դպրոցներում և, ըստ էության, ցիկլը փակված կհամարեն։

Նշենք, որ միջոցառման շրջանակում բացված ցուցահանդեսում նախարարությունն իր տաղավարում ներկայացրել է կրթական նորարարությունները։ Մասնավորապես, ներկայացված են «Թումո» ստեղծարար կենտրոնը, «ԱՅԲ» դպրոցը, ԵՊՀ-ն, «Արմաթ» լաբորատորիաները և այլն։
Արայիկ Հարությունյանը վստահեցրեց, որ վերոնշյալ ծրագրերը կյանքի կոչելուց հետո 3-5 տարվա ընթացքում նախարարության տաղավարը բավարար չի լինելու նորարարությունները ներկայացնելու համար:

Անդրադառնալով տեղեկատվական տեխնոլոգիաների համաժողովին՝ նախարարն ասաց, որ նմանատիպ միջոցառումները միջոց են՝ ամփոփելու այն, ինչ ունենք, ինչպես նաև այն հնարավորություն է տալիս նոր կապեր հաստատել և դրանով ավելի զարգացնելու կրթական ծրագրերը։

Ինչ վերաբերում է բարձրագույն կրթության որակին՝ Արայիկ Հարությունյանն ասաց, որ առաջատար շատ ընկերություններում այսօր աշխատում են հայաստանյան բուհերն ավարտած ուսանողներ։  «Ասել, թե մակարդակը բավարար է, և բոլոր ուսանողները, որոնք ավարտում են տեխնոլոգիական բուհեր կամ ֆակուլտետներ, պատրաստ են այդ ընկերություններում աշխատելու, ճիշտ չէ։ Բայց ունենք այնպիսի ֆակուլտետներ, որ մինչև ավատելը ուսանողներն իրենց տեղն են գտնում ամենազարգացած ընկերություններում»,- ընդգծեց նա։

Նա միաժամանակ նշեց, որ բարելավելու շատ տեղ ունեն. «Մեր խորին համոզմունքն է, որ բուհերում լավագույն մասնագետներ պատրաստելու համար առաջին հերթին պետք է հիմքեր ստեղծենք հանրակրթության ոլորտում, ինչը և անում ենք»։