Հրայր Թովմասյանի հոր պաշտպան. Հնչեցված հարցերը տարակուսելի էին

Բացատրություն վերցնելու ընթացքը նորմալ է անցել, սակայն այն հարցերը, որոնք հնչեցվում էին, առնվազն այս պահին տարակուսելի են: ԱԱԾ շենքից դուրս գալուց հետո լրագրողների հետ զրույցում ասաց Հրայր Թովմասյանի հոր՝ Վարդան Թովմասյանի փաստաբան Ամրամ Մակինյանը: Նա նշեց, որ Վ. Թովմասյանին չէին կանչել հարցաքննության, այլ քրեական գործի հարուցման նախնապատրաստական  փուլն է:  

«Պարոն Թովմասյանին հարցեր են ուղղել, թե իր բնակարանի տանիքը երբ է վերանորոգվել: Այդ հարցերը երեկ էլ էին տվել, այսօր գրավոր պարզաբանումներ տրվեցին»,-ասաց պաշտպանը:

Հիշեցնենք, որ երեկ ԱԱԾ քննիչներն այցելել էին Հ. Թովմասյանի հայրական տուն, հարցեր տվել  բնակարանի տանիքի կառուցման հետ կապված:

Ամրամ Մակինյանի խոսքով, բոլորին է ակնհայտ, թե այս գործողություններն ինչ նպատակով են կատարվում:

«Հանրությունը տեղյակ է, որ մեկ տարի շարունակ օրենսդիր և գործադիր իշխանությունները միջոցներ են ձեռնարկում Սահմանադրական դատարանի դատավորների, այդ թվում՝ Հրայր Թովմասյանի լիազորությունները ցանկացած գնով կասեցնելու ուղղությամբ: Մենք գտնում ենք, որ այս նյութերի նախապատրաստումը, նաև երեկ հրապարակումներ եղան, որ հարուցվել է քրգործ՝ ՀՔԾ-ի կողմից իշխանությունը յուրացնելու դեպքի առթիվ, դրանք ուղղված են բացառապես Հրայր Թովմասյանի՝ որպես Սահմանադրական դատարանի դատավոր լիազորությունները կասեցնելուն, նաև ընդհանուր ճնշում է ՍԴ դատավորների նկատմամբ: Շատ ակնհայտ է կատարվելիքը»,-ասաց նա:

Ա. Մակինյանը նշեց, որ Վարդան Թովմասյանը Հրայր Թովմասյանի ընտանիքի միակ անդամը չէ, որ կանչվել է ԱԱԾ, կանչվել են նաև նրա դուստրերը:

«Մենք մեր զարմանքն ենք  արտահայտում, որ գործադիրը ոչ մի միջոցի առաջ կանգ չի առնում, նաև մարդկանց ընտանիքիներ մտնելով, մեզ համար շատ անհասկանալի քրեական հետապնդման ուղղված գործողություններ սկսելով ընտանիք անդամների նկատմամբ:  Սա ճնշում է ընտանիքի անդամների նկատմամբ »,-ասաց պաշտպանը: