Էդուարդ Թոփչյան. Պետք է մեր կրթական համակարգի մասին շատ լուրջ մտածենք

«Երբ իմ ուսանողների մեջ հայեր են լինում, անմիջապես զգում եմ, գենետիկան ուրիշ է, տաղանդավոր են: Այդ տարբերությունը ես զգում եմ»,- լրագրողների հետ հանդիպմանն ասաց Մոսկվայի Չայկովսկու անվան կոնսերվատորիայի պրոֆեսոր, ջութակահար Սուրեն Հախնազարյանը:

Նրա որդին՝ հայտնի թավջութակահար Նարեկ Հախնազարյանն, ասաց, որ Հայաստանում էլ շատ լավ սերունդ է աճում, շատ տաղանդավոր են, պոտենցիալ ունեն:

Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր էդուարդ Թոփչյանի խոսքով, տաղանդը միշտ կա, սակայն պոտենցիալը պետք է զարգացնել, իսկ դրա համար պետք է կրթություն:

«Մենք պետք է մեր կրթական համակարգի մասին շատ լուրջ մտածենք: Ես սա միշտ ասել էլ, հիմա էլ եմ ասում: Չգիտեմ՝ ով պետք է մտածի, բայց ինձ թվում է կրթական համակարգում էլ հաշիվը 9:1 է»,- նշեց նա՝  նկատի ունենալով Իտալիա-Հայաստան խաղում մեր ազգային հավաքականի պարտությունը 9:1 հաշվով:

Մաեստրոյի խոսքով, հրաշալի է, որ ամբողջ աշխարհում կան շատ լավ ու հաջողությունների հասած հայ երաժիշտներ, երգիչներ, որոնք հիմնականում կրթությունը դրսում են ստացել, բայց Հայաստանում ամեն ինչ վտանգված է:

«Ամեն ինչում մարդը պետք է լինի պրոֆեսիոնալ: Մենք հիմա սովոր ենք խոսել: Խոսելով չի լինի: Երևի մի քանի տասնամյակ էլ  կկորցնենք, մինչև այդ բանը հասկանանք: Իսկ մենք խոսում ենք, PR-ներ ենք անում:

Իրական հայրենասիրությունն այն է, որ այսօր մտածենք, թե ինչ է լինելու ապագան: Իսկ խոսելով… Բոլորս լավ խոսում ենք,  նման պրոբլեմ չկա»,- ասաց Էդուարդ Թոփչյանը: