Նյու Դելիում մեկ օրում 1200 մարդ է բերման ենթարկվել

Նյու Դելիում երեկ  Քաղաքացիության մասին օրենքում փոփոխոթյունների կատարելու դեմ ուղղված բողոքի ակցիաների ընթացքում ձերբակալվել է շուրջ 1200 մարդ:  Ռիա նովոստիի հաղորդմամբ՝ գրել է Times of India թերթը:  Նրանց թվում են ընդդիմության առաջնորդներ և շատ ուրիշ մարդիկ, որոնք, չնայած իշխանության արգելքին, նախօրեին դուրս էին եկել փողոցներ Հնդկաստանի մայրաքաղաքում բողոքի ակցիաներ անելու համար:  Բերման ենթրակվածներից շատերը առավոտյան արդեն ազատ են արձակվել:

Նախքան այդ ակցիաները, կառավարությունը  բջջային կապի մեծ օպերատորներին հրահանգել էր ժամանակավորապես սահմանափակել քաղաքացիների՝ զանգելու, ինտերնետից օգտվելու, հաղորդագրություններ ուղարկելու հնարավորությունը: Բայց և այնպես, այսօր առավոտյան այդ ծառայություններն արդեն շատ շրջաններում վերականգնվել են:

Նյու Դելիում դեռ շարունակվում են անվտանգության միջոցառումները. շարժը որոշ փողոցներում սահմանափակված է, ոստիկանությունը հերթապահում է, ընտրողաբար ստուգում են մեքենաները, վարորդների փաստաթղթերը:

Քաղաքացիության մասին օրենքում սկանդալային փոփոխությունները, որոնք պաշտոնապես ուժի մեջ են մտել, նախատեսում են, որ Հարավային Ասիայի հարևան երկրներից ` Աֆղանստանից, Պակիստանից և Բանգլադեշից ոչ մահմեդականները կարող են պարզեցված կարգով ձեռք բերել հնդկական անձնագիր, եթե նրանք հայրենիքում բախվեն ոտնձգությունների: