Չինաստանի իշխանությունները հայտարարեցին երկրում կորոնավիրուսային համաճարակի պիկի ավարտի մասին

Չինաստանի Առողջապահության կոմիտեի խոսնակ Մի Ֆենգը հայտարարել է, որ երկրում կորոնավիրուսի համաճարակի պիկն անցել է։ Այս մասին գրում է Gazeta-ն։

Ըստ նրա, անցած շաբաթվա ընթացքում Չինաստանի Հուբեյ նահանգում, բացառությամբ Ուհան քաղաքի, չի հայտնաբերվել Covid-2019-ի վարակի ոչ մի նոր դեպք:

Նշված նահանգից դուրս գրանցվել է 7 նոր դեպք, որից 6-ը ներկրվել են:

«Այս տվյալները ցույց են տալիս, որ, ընդհանուր առմամբ, երկրում համաճարակի այս ալիքի գագաթնակետն արդեն անցել է», - ասել է Մի Ֆենգը:

Հիշեցնենք, որ 2019 թվականի դեկտեմբերի 31-ին, Չինաստանի իշխանությունները հայտարարեցին Ուհան քաղաքում թոքաբորբի բռնկման մասին: Հիվանդության պատճառական գործակալը կորոնավիրուսների նոր տեսակ է, որին տրվեց պաշտոնական անուն՝ Covid-2019:

Երեկ արդեն Առողջապահության համաշխարհային կազմակերպությունը հայտարարեց կորոնավիրուսի համաճարակի մասին։