Կրակի հետ եք խաղում. Վրաստանի գլխավոր վարակաբանը զգուշացնում է վարակի նոր վտանգների մասին

Վրաստանի հիվանդությունների կանխարգելման ու հանրային առողջության ազգային կենտրոնի տնօրեն Ամիրան Գամկրելիձեն բնակչությանը խորհուրդ է տվել կրակի հետ չխաղալ, մնալ տներում, չնպաստել վարակի տարածմանը:Այս մասին գրում է Aliq Media-ն։

Ապրիլի 14-ին Վրաստանում առաջին անգամ միանգամից  30 նոր դեպք հաստատվեց, սա ըստ վարակաբանի՝ մտահոգիչ նշան է:

«Մենք գոնե մեկ րոպե թուլանալու ու հանգստանալու իրավունք չունենք: Ես էլի տեսնում եմ Թբիլիսիի փողոցներում մեծ շարժ, շատ մեքենաներ, մարդիկ հավաքվում են: Սա անթույլատրելի է: Իմացեք՝ կրակի հետ եք խաղում: Եկող 2-3 շաբաթները շատ ծանր են լինելու: Մեծ թվեր են սպասվում: Ես կրկին կոչ եմ անում՝ հետևեք պետության հորդորներին»,-ասել է Գամկրելիձեն։

Եթե Վրաստանում մի քանի հազար դեպք գրանցվի, պացիենտների 20-30%-ին ինտենսիվ թերապիա և  վերակենդանացման միջոցառումներ են անհրաժեշտ լինելու, իսկ սա ըստ մասնագետի՝ մեծ բեռ է երկրի առողջապահական համակարգի համար, հետևաբար՝ մեծ կորուստներ են լինելու: