Գեղարքունիքում գրանցվել է կորոնավիրուսից մահվան առաջին դեպքը

Գեղարքունիքի մարզում հաստատվել է կորոնավիրուսային հիվանդության 51 դեպք, մահացել է մեկ քաղաքացի։ Այս մասին ֆեյսբուքյան իր էջում գրառում է կատարել Գեղարքունիքի մարզպետ Գնել Սանոսյանը։

Նա տեղեկացրել է, որ 87 տարեկան կինը ունեցել է կորոնավիրուսային հիվանդություն, 8 տարի  անկողնային հիվանդ է եղել, ունեցել է նաև խրոնիկ հիվանդություններ՝ սրտի իշեմիկ հիվանդություն,  ինշիմիկ ինսուլտ է տարել մի քանի անգամ։

«Երեք օր առաջ պացիենտի դստեր մոտ գրանցվել է կորոնավիրուսային հիվանդության դրական արդյունք, երկու օր հետո իր թեստի պատասխանն է դրական եկել։ Ցավոք, ուղեկցվող հիվադությունների պատճառով հնարավոր չի եղել պացիենտի կյանքը փրկել»,- նշել է Գ. Սանոսյանը։

Հավելենք, որ կորոնավիրուսային հիվանդությամբ  պայմանավորված, մարզում մեկուսացված են 172 քաղաքացի, 617 քաղաքացի ինքնամեկուսացված է։