Հունաստանն առաջարկում է թույլատրել շրջայցեր իրականացնել COVID-19-ը հաղթահարած երկրների միջև

Հունաստանը առաջարկել է ստեղծել «անվտանգ միջանցք», որը թույլ կտա ճանապարհորդել կորոնավիրուսային համաճարակը հաջողությամբ հաղթահարած երկրների միջև, փոխանցում է «Ռիա Նովոստի»-ն։

Հունաստանի վարչապետ Կիրիակոս Միցոտակիսը վստահեցրել է, որ նման միջոցը հնարավորություն կտա արագ վերակենդանացնել զբոսաշրջության ոլորտը:

Միցոտակիսը կոչ է արել առաջարկը քննարկել այն յոթ երկրների կառավարությունների ղեկավարների հետ, որոնք հաղթել են վիրուսը: Այդ երկրներն են Ավստրիան, Դանիան, Նորվեգիան, Իսրայելը, Սինգապուրը, Չեխիան և Ավստրալիան:

Նշվում է, որ ապահով միջանցքներում պահպանվելու են հիգիենայի չափորոշիչները, որոնք թույլ կտան զբոսաշրջիկներին անվտանգ ճանապարհորդել՝ առանց վտանգելու իրենց և իրենց այցելած երկրների բնակիչներին։