Ճապոնացի մանկաբույժները նախազգուշացրել են նորածինների համար բժշկական դիմակների վտանգների մասին

Ճպոնիայի մանկաբույժների ասոցիացիան ծնողներին նախազգուշացրել է, որ չնայած կորոնավիրուսի տարածմանը, երկու տարեկանից ցածր երեխաների համար դիմակներ կրելը վտանգավոր է:

«Դիմակները կարող են դժվարացնել շնչառությունը, քանի որ նորածիններն ունեն նեղ շնչուղիներ»,-ինչպես փոխանցում է «Ինտերֆաքս»-ը, այդ մասին հաղորդել են ասոցիացիայից՝ հավելելով, որ դիմակները նաև մեծացնում են երեխաների մոտ ջերմային հարվածի ռիսկը:

Ասոցիացիան կոչ է անում դադարեցնել երկու տարեկանից ցածր երեխաների համար դիմակների օգտագործումը:

Մինչ այժմ երեխաների շրջանում կորոնավիրուսով վարակվելու շատ քիչ դեպքեր են գրանցվել, որոնց մեծ մասը վարակվում է ընտանիքի անդամներից: Ըստ ճապոնացի մանկաբույժների, դպրոցներում կամ մանկապարտեզներում գործնականում հիվանդության բռնկումներ չեն եղել:

Այն բանից հետո, երբ կորոնավիրուսի վարակի դեպքերի քանակը սկսել է նվազել, Ճապոնիայի վարչապետ Սինձո Աբեն երկուշաբթի օրը չեղյալ է հայտարարել արտակարգ դրությունը: