ԱՀԿ-ն կասեցնում է հիդրօքսիքլորոքինի և քլորոքինի փորձարկումները՝ COVID-19-ի բուժման համար

Առողջապահության համաշխարհային կազմակերպությունը ժամանակավորապես դադարեցրել է հիդրօքսիքլորոքինի և քլորոքինի փորձարկումները՝ որպես COVID-19-ի հիվանդության բուժում: Այս մասին, Tass-ի հաղորդմամբ, նախօրեին հայտարարել է ԱՀԿ գլխավոր տնօրեն Թեդրոս Ադան Գեբրիեսուսը:

Գեբրիեսուսը նշել է, որ հրապարակվել է ուսումնասիրություն՝ կապված COVID-19-ով հոսպիտալացված հիվանդների վրա հիդրօքսիքլորոքինի և քլորոքինի ազդեցության մասին: Այս ուսումնասիրության հեղինակները պնդում են, որ այս դեղերը առանձին կամ մակրոլիդի (հակաբիոտիկներից մեկը) հետ համատեղ ստացող հիվանդների շրջանում գրանցվել է մահացության ավելի բարձր ցուցանիշ:

«Սա վերաբերում է միայն հիդրօքսիքլորոքինի և քլորոքինի օգտագործմանը COVID-19- ի բուժման համար», - ասել է Գեբրիեսուսը, հավելելով, որ այդ դեղերը «շարունակում են անվտանգ համարվել աուտոիմուն հիվանդությունների և մալարիայով հիվանդների համար»: