95%-ով զբաղված են վերակենդանացման բաժանմունքի մահճակալները. Արման Հովակիմյան

Ապրիլի 2-ից «Սուրբ  Գրիգոր Լուսավորիչ»բժշկական կենտրոնը վերապրոֆիլավորվել է՝  կորոնավիրուսով հիվանդներին սպասարկելու համար: Պարետատան նիստից հետո ճեպազրույցի ընթացքում ասաց կենտրոնի տնօրեն Արման Հովակիմյանը, միաժամանակ ներկայացնելով վիճակագրական տվյալներ:

«Ունենք մոտ 500 մահճակալ, որոնցից 80-ը ՝վերակենդանացման բաժանմունքում է, 420-ը՝ ընդհանուր բաժանմունքում: Այսօր 95 տոկոսով զբաղված են վերակենդանացման բաժանմունքի և 85 տոկոսով ընդհանուր բաժանմունքի մահճակալները»,- ասաց Հովակիմյանը:

Նրա փոխանցմամբ՝ հիվանդանոցը ցայսօր ընդունել է նոր կորոնավիրուսով վարակված 1470 հիվանդ, որոնցից 450 եղել են ծանր և ծայրահեղ  ծանր:

«Պետք է նշեմ, որ ծանր պացիենտները կարիք ունեն վերակենդանացման բաժանմունքի  ծառայությունների, որն այսօր ամենասուղն է: Վերջին օրերին ավելացել են ծանր և ծայրահեղ ծանր դեպքերը: Ուզում եմ հորդորել մեր համաքաղաքացիներին, հետևել պարետատան կանոններին, որպեսզի առաջնագծում ծառայող մեր բժշկները կարողանան օգնություն ցույց տալ բոլոր հիվանդներին»,- հավելեց բժշկական կենտրոնի տնօրենը: