Հունաստանն առաջարկում է բոյկոտել թուրքական ապրանքները՝ Սուրբ Սոֆիայի վերաբերյալ որոշման պատճառով

Հունաստանում պաշտոնյաներն առաջարկել են արգելել թուրքական ապրանքների ներմուծումը՝ Սուրբ Սոֆիայի տաճարը մզկիթի վերածելու երկրի որոշման պատճառով: Այս մասին գրում է Gazeta-ն։

Համապատասխան առաջարկն արել է Առևտրային պալատի նախագահ, ձեռներեց Վասիլիս Կորկիդիսը:
Նա գործարարներին հորդորել է էմբարգո կիրառել այդ ապրանքների վրա, իսկ գնորդներին՝ բոյկոտել թուրքական արտադրանքը:

Կորկիդիսը նաև կարծիք է հայտնել, որ ԵՄ-ն պետք է պատժամիջոցներ կիրառի Թուրքիայի նկատմամբ:

Հիշեցնենք, որ Թուրքիայի նախագահ Ռեջեփ Թայիփ Էրդողանը ստորագրել է հրամանագիրը՝ Սուրբ Սոֆիային մզկիթի կարգավիճակ շնորհելու մասին՝ վերացնելով 1934 թվականին Թուրքիայի իշխանությունների համապատասխան որոշումը: