Համազգային գործողություններ պետք է լինեն մեր ինքնությունը պաշտպանելու համար. Արա Հակոբյան

«Ազգային օրակարգ» կուսակցությունը  բողոքի ակցիա է անցկացնում կառավարության շենքի առջև: Պահանջը՝  կառավարության հրաժարական ողջ կազմով:

«Ազգային օրակարգ» կուսակցության խորհրդի նախագահ Արա Հակոբյանը լրագրողներին ասաց, որ դուրս են եկել պաշտպանելու այն բոլոր գործոնները, տարրերը, որոնք հատկորոշում են հայի ինքնությունը:

«Կրթության բնագավառում այսօր թիրախավորված են այդ ինքնության հատկանիշները, դա վերաբերում է հայոց լեզվին, հայոց պատմությանը, ազգային  դավանանքին, ռազմահայրենասիրությանը, հայ ընտանիքն: Մենք կարծում ենք, որ համազգային գործողություններ պետք է լինեն  մեր ինքնությունը պաշտպանելու համար:

Տվյալ դեպքում անդրադարձ ենք կատարում իշխանության կողմից կրթության ոլորտում իրականացվող գործողություններին: Հենց այսօր ԱԺ-ում տեղի ունեցավ քվեարկություն և մեծամասնությունը, իշխանության ներկայացուցիչները պաշտպանեցին ոչ այնքան ԿԳՄՍ նախարար Արայիկ  Հարությունյանին, որքան այն ռազմավարությունը, քաղաքականությունը, որն իրականացվում է  կրթության ոլորոտում: Դա նշանակում է, որ  տվյալ իշխանությունը պատասխանատու է և ընդհանրական, և անհատական: Սա նշանակում է, որ առանձին անհատի փոփոխությամբ, եթե  մոտեցումը ծրագրային է, դժվար է ընդհանրական փոփոխություն անել: Այդ պատճառով «Ազգային օրակարգ» կուսակցությունը հանրային  մի շարք անգամ իր մոտեցումներն արտահատել է, հիմա եկել ենք այստեղ ասելով՝  առանձին անհատները կարող են գնալ, բայց  խնդրի արմատական լուծումը նշանակում է ամբողջ իշխանության, բոլոր  պատասխանատուների  հեռացումը: Դա վերաբերում է  ինչպես կառավարությանը, այնպես էլ  Ազգային ժողովին»,- ասաց Ա.Հակոբյանը:

Նա նշեց, որ հանդես են եկել հայտարարությամբ, որ ազգային ծրագրերի ու նպատակների շուրջ համախմբում լինի բոլոր այն ուժերի, որոնք այդպես են կարծում. «Մենք կարծում ենք, որ համախմբումն այս փուլում չպետք է լինի որևէ  անհատի կամ  որևէ քաղաքական ուժի շուրջ, այլ լինի ծրագրային: Կարծում ենք՝ դա հնարավոր է, արդեն այդ ուղղությամբ կան քայլեր»:

Ա. Հակոբյանի կարծիքով, հնարավոր է փոփոխություն միայն քաղաքական հանրային ճնշման միջոցով:

«Բոլոր գործողությունները պետք է միտված լինեն դրան, որպեսզի Հայաստանում փոխվի իրավիճակը, իրադարաձություններն այլ ընթացք ունենան, դադարի Հայաստանում բոլոր ոլորտներում իրականացվի ապազգային քաղաքականություն, ռազմավարություն:
Հիմա խոսում ենք կրթությունից, բայց այնպես չէ, որ չունենք ճգնաժամային իրավիճակ առողջապահության, տնտեսության մեջ, սոցիալական ոլորտում: Բոլոր ոլորտներում ունենք ճգնաժամ,  որը ուզում է  լուծում, որը պետք է լինի արմատական: Եղած իշխանությունն ամբողջովին պետք է հեռանա»,- ասաց «Ազգային օրակարգ» կուսակցության խորհրդի նախագահը:

Նրա խոսքով, այս իշխանությունն ունի ժողովրդի որոշ մասի վստահությունը, բայց տեսանելի է արդեն, որ տարբեր շերտեր դժգոհություն են արտահայտում, այն վստահությունը որ վայելում էր, էական անկում է  ապրում:

Ա. Հակոբյանը նշեց, որ իրենք իշխանափոխության համար առաջարկում են որոշակի ճանապարհային քարտեզ: 

«Հայաստանում ունենք ճգնաժամ, բարձր լարումներ բոլոր ոլորտներում, հանրության մեջ ունենք լարում: Այս իրավիճակում անել արտահերթ ընտրություններ, այդ լարվածությունը կավելանա: Մենք առաջարկում ենք հետևյալ ճանապարահային քարտեզը՝ լինի միջանկյալ փուլ, որն իր մեջ ներառի ազգային համաձայնության  իշխանություն,  որի նատակը պետք է լինի մեղմել ճնշումները, ճգնաժամի  դրսևորումները,  և նախապատրաստել արտահերթ ընտրությունների»,- ասաց Ա.Հակոբյանը: