«Հրապարակ». Արտախորհրդարանական ուժերի հանդիպումը վարչապետի հետ կարող է պարբերական բնույթ կրել

«Հրապարակ» թերթը գրում է. «Վարչապետ Նիկոլ Փաշինյանի և արտախորհրդարանական ուժերի հանդիպումը կարող է պարբերական բնույթ կրել. նման տպավորություն է ստացել հանդիպմանը մասնակցած «Ժառանգություն» կուսակցության ներկայիս ղեկավար Նարինե Դիլբարյանը։ Ավելին, չի բացառվում, որ ընդլայնվի նաև ձևաչափը, և նոր ուժեր ու անհատներ մասնակցեն։

«Ես չգիտեմ՝ ինչ սկզբունքով էր ընտրվել մեր հանդիպման ֆորմատը, բայց առաջարկել եմ ընդլայնել շրջանակը և մասնավորապես հրավիրել նախկին վարչապետերի, որոնք պետական կառավարման ոլորտում և ռազմական իրավիճակներում աշխատելու փորձ ունեն՝ Վազգեն Մանուկյան, Հրանտ Բագրատյան, Արմեն Դարբինյան, թեև վերջինս պատերազմական իրավիճակում չի աշխատել, բայց կառավարման համակարգի փորձ ունի»,- երեկ մեր լրագրողին ասել է Դիլբարյանը՝ տեղեկացնելով նաև, որ Փաշինյանը կարծես թե համաձայնել է առաջարկին։

Իսկ նախօրեին տեղի ունեցած հանդիպումը, Դիլբարյանի խոսքով, տեղեկատվության փոխանակման և խորհրդատվական բնույթ է կրել, մեկ այլ կարծիքի համաձայն՝ որոշումներ կայացնելու պատասխանատվությունը բաշխելը»։

Մանրամասները թերթի այսօրվա համարում