Հանրաճանաչ իսրայելցի ջութակահար. Շատ հիասթափված եմ, որ իմ երկիրը զինամթերք է վաճառում Ադրբեջանին

Հանրաճանաչ իսրայելցի ջութակահար Սերգեյ Օստրովսկին աջակցություն է հայտնել հայ ժողովրդին Արցախի Հանրապետությունում տեղի ունեցող ռազմական գործողությունների հետ կապված։

«Անսահման մտահոգված եմ, որ նորից Թուրքիան Ադրբեջանի միջոցով հարձակվել է Հայաստանի վրա՝ Լեռնային Ղարաբաղում, և ռմբակոծում է հայկական քաղաքներն ու բնակչությանը։
Եվ շատ հիասթափված եմ, որ իմ երկիրը զինամթերք է վաճառում Ադրբեջանին։ Բիզնեսը պետք է ունենա գոնե մի քիչ բարոյական արժեքներ։

Վե՛րջ տվեք Ադրբեջանի ագրեսիային

Աջակցե՛ք Հայաստանին»,- գրել է նա։

Հանրաճանաչ իսրայելցի ջութակահարի խոսքը ներկայացրել է Հայաստանի ազգային ֆիլհարմոնիկ նվագախումբը:

Իտալացի անվանի թավջութակահար Մարիո Բրունելլոն (Չայկովսկու անվան մրցույթի դափնեկիր) նույնպես աջակցությունը է հայտնել.

«Սիրելի՛ Ալեքս (ուղերձն ուղղված է անվանի հայ թավջութակահար Ալեքսանդր Չաուշյանին, խմբ․), ես շատ ցավում եմ այն ամենի համար, ինչ կատարվում է քո երկրում։ Հույս ունեմ, որ հայրենակիցներդ, ընկերներդ կհասնեն խաղաղության։

Դա հիասքանչ մի երկիր է, և ինձ համար մեծ պատիվ է այնտեղ հանդես գալն ու նվագելը։ Հույս ունեմ, որ շուտով կվերադառնամ ու խաղաղություն կլինի բոլորի համար»։