ՌԴ և Ֆրանսիայի ղեկավարները հեռախոսազրույցով քննարկել են ԼՂ հարցը

 ՌԴ և Ֆրանսիայի ղեկավարները հեռախոսազրույցով քննարկել են ԼՂ հարցը։ Այս մասին հայտնում  են Կրեմլից։

«Ռուսաստանի նախագահը ցավակցություն է հայտնել հոկտեմբերի 16-ին Փարիզի արվարձանում տեղի ունեցած ահաբեկչության` ֆրանսերենի ուսուցչի բարբարոսական սպանության կապակցությամբ: Այս համատեքստում նրանք վերահաստատել են փոխադարձ հետաքրքրությունը՝ ահաբեկչության և ծայրահեղական գաղափարների տարածման դեմ պայքարում ։

Մանրամասն քննարկվել է Լեռնային Ղարաբաղի հակամարտության գոտու շուրջ իրավիճակի զարգացումը։ Վլադիմիր Պուտինը տեղեկացրել է ռազմական գործողությունների հետագա էսկալացիայի կանխման և Լեռնային Ղարաբաղի հիմնախնդրի քաղաքական-դիվանագիտական կարգավորման նպատակով բանակցությունների շուտափույթ վերսկսման ուղղությամբ ձեռնարկվող քայլերի մասին:

Շեշտվել է հոկտեմբերի 10-ին և 17-ին հակամարտող կողմերի միջև ձեռք բերված՝ կրակի դադարեցման մասին պայմանավորվածությունների պահպանման կարևորությունը:

Ընդգծվել է նաև Ռուսաստանի և Ֆրանսիայի՝ որպես ԵԱՀԿ Մինսկի խմբի համանախագահների, ինչպես նաև ՄԱԿ-ի Անվտանգության խորհրդի գծով սերտ համակարգումը շարունակելու պատրաստակամությունը»,- տեղեկացնում է պաշտոնական աղբյուրը: