Նկարիչ Համազասպ Մխիթարյանի գործերը դրվել են աճուրդի՝ հանուն Արցախի

Հայ նկարիչ Համազասպ Մխիթարյանի (Ամուզա) աշխատանքները ներկայացվել են «Art For Armenia» բարեգործական աճուրդին, իսկ աշխատանքների վաճառքից ստացված ողջ հասույթը փոխանցվելու է «Հայաստան» համահայկական հիմնադրամին: Այս մասին իր ֆեյսբուքյան էջում հայտնել է նկարչի դուստրը ՝ Լիա Մխիթարյանը:

«Հայրիկի «Թափառող նկարիչներ», «Պարողները», «Մայրություն» ստեղծագործությունները մասնակցում են «Art For Armenia» բարեգործական աճուրդին:
Աշխատանքների վաճառքից ստացված ողջ հասույթը փոխանցվելու է «Հայաստան» համահայկական հիմնադրամին ՝ Հայաստանի ամենամեծ հիմնադրամին, որը 1992 թվականից ի վեր Հայաստանում և Լեռնային Ղարաբաղում իրականացրել է ավելի քան 1300 նախագիծ ՝ կրթության, առողջապահության, ենթակառուցվածքների և գյուղական համայնքների զարգացման ոլորտում:

Աճուրդին կարող եք մասնակցել հոկտեմբերի 24-ից։

Հորս աշխատանքներից բացի, կան այլ երկրներից ժամանած այլ նկարիչների ավելի քան 200 աշխատանքներ: Միացե՛ք»: - գրել է նա՝ հրապարակելով նաև աշխատանքների հղումները։