Բոլորի նկատմամբ կիրառվելու են աշխատանքից ազատելու և օրենքով նախատեսված այլ պատժամիջոցներ. ԱՀ նախագահ

Արցախի Հանրապետության նախագահ Արայիկ Հարությունյանն արձագանքել է կառույցներում պետական պաշտոններ զբաղեցնողների՝ պատերազմի ժամանակ Արցախը լքելու փաստերի մասին սոցիալական հարթակներում ծավալված քննարկումներին:

«Սիրելի՛ հայրենակիցներ

Հաշվի առնելով պատերազմի առաջին օրերից Արցախի Հանրապետությունը լքած բարձր և ցածր օղակների պետական պաշտոնյաների դրսևորած ամոթալի վարքագծի փաստի առթիվ հանրային հարթակներում ծավալված քննարկումները՝ հավաստիացնում եմ, որ բոլորի նկատմամբ կիրառվելու է համապատասխան որոշում՝ աշխատանքից ազատելու և, իրավիճակին համարժեք, օրենքով նախատեսված այլ պատժամիջոցներ իրականացնելու համար:

Միաժամանակ, պատրաստակամություն եմ հայտնում ևս մեկ անգամ հնարավորություն տալու բոլոր նրանց, ովքեր գիտակցել են իրենց անպատասխանատու արարքի ամբողջ ծանրությունը և այսուհետ կլծվեն Հայրենիքի առջև իրենց քաղաքացիական պարտքը կատարելու վեհ գործին»,- իր ֆեյսբուքյան էջում գրել է Արայիկ Հարությունյանը: