ՊՆ ներկայացուցիչ. Շուշիի ժայռերը մագլցող դիվերսանտները ոչնչացվել են

«Այսօր թշնամին Կարմիր Շուկայի ուղղությամբ փորձել է մատակարարումներ իրականացնել, մեքենաներով ճեղքում կատարել։ Խոցվել են մի քանի մեքենա, այդ թվում անձնակազմով բեռնված մեքենա»,- տեղեկատվական կենտրոնում հայտարարեց Պաշտպանության նախարարության ներկայացուցիչ Արծրուն Հովհաննիսյանը։

Նրա ներկայացմամբ, հակառակորդը փորձում է տարբեր ուղղություններով ամենաչնչին հաջողությունը գրանցել, որպեսզի ներկայացնի իր առաջընթացը։

«Բայց մեր զորքերը, վճռականությունն անսասան են»,- նշեց նա՝ համոզմունք հայտնելով՝  հաղթելու ենք։

Ա. Հովհաննիսյանը նկատեց, որ Շուշի-Բերձոր ճանապարհով երթևեկել,  քաղաքացիների անվտանգությունից ելնելով, չի թուլատրվում, չնայած Լիսագորի հատվածը երեկ մաքրվել է ու պարեկային ծառայություն է իրականացվում։

«Զուտ քաղաքացիների անվտանգությունից ելնելով, քանի որ կարող են հրետակոծել, դիվերսիոն խմբերը վնաս պատճառել մարդկանց, մեքենաներին, այս պահին չի թույլատրվում այդ ուղղությամբ երթևեկել»,- ասաց նա։

Բանախոսը նշեց, որ Շուշիի մատույցներում՝ Քարին տակի ու այլ ուղղությամբ որոշ վարձկաններ ու դիվերսանտներ փորձել են ժայռերը մագլցել, բայց ոչնչացվել են՝ մնալով ժայռերի տակ։