Bild-ի խմբագիր. Շատ թղթակիցներ կան, որոնք կարող են ապացուցել՝ Ալիևը ստում է

Արցախում ընթացող  պատերազմական գործողությունները լուսաբանող Bild գերմանական պարբերականի գլխավոր խմբագիր Փոլ Ռոնժեյմերը թվիթերյան գրառմամբ արձագանքել է Ադրբեջանի նախագահ Իլհամ Ալիևի՝ BBC-ին տված հարցազրույցում հնչեցրած հայտարարություններին։

«Միայն BBC-ին չէ, որ գիտե՝ նախագահը կրկին ու կրկին ստեր է ասում։ Մենք այնտեղ ենք գտնվել երկու շաբաթ, տեսել ենք, թե ինչպես են ամեն օր ու գիշեր հրատակոծվում քաղաքացիական շրջանները։

@azpresiden, շատ թղթակիցներ կան, որոնք կարող են ապացուցել՝ Դուք ստում եք»,-թվիթերի իր միկրոբլոգում արձագանքելով Ալիևից հարցազրույց վերցրած BBC-ի թղթակցի գրառմանը՝ գրել է Bild-ի խմբագիրը։

Հիշեցնենք, որ Ադրբեջանի նախագահ Իլհամ Ալիևը հարցազրույց է տվել BBC-ին ու, մեղմ ասած, անհարմար վիճակում հայտնվել, լրատվականին մեղադրել «Fake News» (կեղծ տեղեկատվություն) տարածելու մեջ։

BBC-ի հաղորդավար Օրլա Գերինը նշում է, որ BBC-ի լրագրողները, որ հոկտեմբերի 1-ից 3-ը եղել են Ստեփանակերտում, հայտնել են, որ քաղաքը ենթարկվել է ռմբակոծության՝ ներառյալ շտապօգնության ծառայության տարածքը, ավերվել է բազմահարկ բնակելի շենքը, երբ մարդիկ փորձել են փախչել, երկնքում եղել է անօդաչու թռչող սարք, կարճ ժամանակ անց կրկին հրաձգություններ, ինչը բնութագրվել է որպես հրաձգություն՝ առանց ռազմական թիրախների։

«Այս ամենն ուղղակի տեղեկություններ չեն։ Այս ամենը տեսել և նկարահանել են BBC-ի լրագրողները»,- ասում է հարցազրույցավարը։

Այս ամենին ի պատասխան Ալիևը կասկածի տակ է դնում այս վկայությունները։