Կիմ Բալայան. Միակ պահանջս դա է՝ քրեական պատասխանատվության ենթարկել Նիկոլ Փաշիյանին

Սահմանադրական դատարանի նախկին անդամ Կիմ Բալայանի համար հացադուլը ծայրահեղ քայլ է, սակայն պատրաստ է մեռնել արդարության հասնելու համար:

«Ես համոզված էլ չեմ, որ կարող եմ երկար ձգել, բայց հանուն հայրենիքի, եթե մեր քաջ զինվորները գնացին զոհվեցին, ես էլ պատրաստ եմ այստեղ մեռնել արդարության հասնելու համար: Հացադուլ հայտարարել եմ մինչև Նիկոլ Փաշինյանի հրաժարականին հասնելը»,- լրագրողներին ասաց Կիմ Բալայանը, որը միացել է կառավարության դիմաց երեկվանից վարչապետ Նիկոլ Փաշինյանի հրաժարականի պահանջով անժամկետ հացադուլ սկսած ՀՅԴ-ական Գեղամ Մանուկյանին և Գարիկ Ավետիսյանին:

«Ես գտնում եմ, որ իրավական ճանապարհով պետք է բոլոր հարցերը լուծվեն: Նիկոլ Փաշինյանը, խախտելով սահմանադրական կարգը, փաստորեն կնքել է միջազգային պայմանագիր, սակայն դա ընթացակարգերով չի սահմանվել: Պայմանագիրը նախևառաջ պետք է բերվեր Սահմանադրական դատարան, ՍԴ-ն պետք է որոշեր, որ պայմանագիրը չի հակասում ՀՀ Սահմանադրությանը, պետք է այն գնար Ազգային ժողով և այնտեղ այն վավերացվեր: Այդ կարգը նա խախտել է, հետևապես տապալել է սահմանադրական կարգը: Սահմանադրական կարգը տապալելու համար գլխավոր դատախազը, ՀՔԾ պետը պարտավոր են քրգործ հարուցել և նրան քրեական պատասխանատվության ենթարկել:

Միակ պահանջս դա է, որ քրեական պատասխանատվության ենթարկել և հետևապես տա իր հրաժարականը: Այսինքն հրաժարական կարող է արդեն չտալ, որովհետև նախնական կալանքի վերցնելու պարագայում նա արդեն զրկված կլինի իր լիազորությունների իրականացումից»:

Կիմ Բալայանն ասաց, որ դրանից հետո թե ԱԺ-ն ում վարչապետ կնշանակի, ինչպես առաջ կշարժվի, բոլորովին այլ հարց է:

«Եթե քաղաքական տեսանկյունից վերցնենք, միանշանակ է, որ չի կարող կապիտուլյացիոն պայմանագիր ստորագրած անձը այսօր բանակցային գործընթացի մեջ մտնի: Եթե վերցնեք հայտարարությունը, կտեսնեք, որ նույն հայտարարության մի շարք կետեր այսօր ոտնահարվում են: Ինչի՞ պետք է ադրբեջանցի փախստականները գան, իսկ մեր փախստականները մնան օդում կախված: Որտե՞ղ է դա գրված, նման կետ կա՞: Ոչ, բայց դուք տեսնում եք, թե ինչ են բերել մեր ժողովրդի գլխին»,- նշեց նա: