Վիրավորները վերականգնողական անվճար բուժում կարող են անցնել իրենց ընտրած բուժհաստատություններում

ՀՀ առողջապահության նախարար Արսեն Թորոսյանը կառավարության նիստում հայտնեց, որ ներկայում գործող ՀՀ կառավարության 2013 թվականի հուլիսի 25-ի N 806-Ն որոշմամբ հաստատված «Զինծառայողներին, ինչպես նաև փրկարար ծառայողներին և նրանց ընտանիքի անդամներին բժշկական օգնության ծառայություններ» ծրագրով սահմանված է, որ վերականգնողական բուժօգնությունը այլ բուժհաստատություններում ենթակա չէ փոխհատուցման:

«Այս փոփոխությամբ առաջարկում ենք վերականգնողական բուժօգնությունը տեղափոխել բաց պայմանագրերի դաշտ, որ մերժումների և մրցակցության սահմանափակման հարց չունենանք: Այսինքն՝ ցանկացած ԲԿ, որն ունի նման ծառայություններ մատուցելու կարողություններ՝ հաստատված համապատասխան լիցենզիայով, կարողանա այդ ծառայությունները մատուցել, և հերթերի, հերթագրման ու մերժումների խնդիր չառաջանա»,-ներկայացնելով  վերոնշյալ նախագծի փոփոխության մասին հարցը՝ հայտնեց Արսեն Թորոսյանը:

Նկատելով, որ փոփոխությամբ հայրենիքի պաշտպանությանը մասնակցած անձանց վերականգնողական բուժման ծախսերը պետությունը վերցնում է իր վրա, Նիկոլ Փաշինյանն էլ իր կողմից շեշտեց. «Այսինքն՝ մենք քաղաքացուն ասում ենք, որ դուք ընտրեք, թե որտեղ եք ուզում անցնել այդ վերականգնողական բուժումը, և Կառավարությունը կվճարի այդ բուժման համար»: