2016 թվականին Հայաստանը ճանաչելու էր ԼՂՀ անկախությունը. Էդվարդ Նալբանդյան

«2016 թվականի ռազմական գործողությունները կանգնեցվեցին 3.5 օրվա ընթացքում, այն ժամանակ Հայաստանը պատրաստել էր բոլոր փաստաթղթերը Լեռնային Ղարաբաղի ճանաչման համար և մենք պատրաստ էինք դրան»,- Ղարաբաղյան հակամարտության վերաբերյալ տեսակապով կայացած կլոր սեղան-քննարկման ժամանակ հայտարարեց ՀՀ ԱԳ նախկին նախարար Էդվարդ Նալբանդյանը և հավելեց, որ այդ ընթացքում գնում էին ինտենսիվ բանակցություններ և եթե դրանք արդյունք չտային՝ Հայաստանը կճանաչեր ԼՂՀ անկախությունը:

Նալբանդյանը հայտարարեց, որ վերջին պատերազմի ժամանակ Հայաստանը բոլոր հիմքերն ուներ ճանաչելու Լեռնային Ղարաբաղի անկախությունը։

Նրա կարծիքով, ի տարբերություն 2016 թվականի ապրիլյան պատերազմի, այս պատերազմը շատ ավելի երկար է տևել և Ադրբեջանը երեք անգամ խախտել է հումանիտար զինադադարի մասին պայմանավորվածությունները։

Նալբանդյանի խոսքով, այդ փաստերը բավական էին, որպեսզի Երևանը ճանաչեր Արցախի անկախությունը, և այն կարող էր օգուտ տալ գործընթացին։

ՀՀ ԱԳ նախկին նախարարը նկատեց, որ երկար տարիներ Հայաստանը ձեռնպահ է մնացել նման քայլից, քանի որ միջազգային հանրությունն ու ԵԱՀԿ Մինսկի խմբի համանախագահներն ասում էին, որ ճանաչումը կվտանգի բանակցությունների հետագա ընթացքը: