Էգեյան Ավիաուղիները վերսկսում է թռիչքներն Աթենքից դեպի Երևան՝ զեղչային վաճառքով

Թուրքիայի կողմից հովանավորված ադրբեջանական զինուժի և սիրիացի վարձկանների՝ Արցախի վրա հարձակման պատճառով դադարեցվեցին ուղիղ չվերթները Հունաստանի և Հայաստանի միջև, որոնք իրականացվում էին «Aegean Airlines»-ի (Էգեյան Ավիաուղիներ) և Wizz Air-ի կողմից:

Սակայն նոյեմբերի 9-ին հրադադարի ռեժիմի դառը պայմանագրի ստորագրմամբ Հայաստանում վիճակը դանդաղորեն նորմալանում է: Այս մասին գրում է Greek City Times-ը։

Էգեյան ավիաուղիները մարտի 31-ից կվերսկսեն թռիչքները Աթենքից դեպի Երևան՝ զեղչված գներով:

Նշվում է, որ դեպի Երևան զեղչված թռիչքները հասանելի կլինեն մինչ հունվարի 11-ը:

«Եթե Հունաստանի սահմաններից դուրս միջազգային արձակուրդ եք փնտրում, ինչու չքննարկել Հայաստանը և աջակցել ժողովրդին ու տնտեսությանը, որն ավերվել է Թուրքիայի կողմից հովանավորված Արցախ ներխուժումից հետո»,- գրում է կայքն ու ներկայացնում Հայաստանի տեսարժան վայրերի նկարները։