Ադրբեջանական կողմի պահանջով այսօր Արցախում որոնողական աշխատանքներ չեն իրականացվի

Երեկ որոնողական աշխատանքների ընթացքում Արցախում՝ Քարին տակ գյուղում, հայտնաբերվել է քաղաքացիական անձի մարմին:  Panorama.am-ին Արցախի Արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը տեղեկացրեց, որ 1963 թ. ծնված բնակչուհու Ալվարդ Թովմասյանի աճյունը որոնողական խումբը  գտել է տան բակում: Հարազատները ճանաչել են զոհված կնոջ ինքնությունը, նշանակվել է դատաբժշկական փորձաքննություն՝ մահվան պատճառը պարզելու համար:

Հ.Թադևոսյանի խոսքով, Թալիշի, Հադրութի և Մատաղիսի ուղղություններով որոնողական աշխատանքների ժամանակ զոհվածների աճյուններ չեն հայտնաբերվել։ Ընդհանուր առմամբ, նոյեմբերի 13-ից մինչև հունվարի 13-ը հայտնաբերվել է 1230 զինծառայողների և քաղաքացիական անձանց աճյուններ:

Նա տեղեկացրեց, որ այսօր որոնողական աշխատանքներ չեն իրականացվելու. «Կապված չէ երեկվա՝ հրադադարի ռեժիմի խախտման դեպքի հետ, երբ զինծառայող էր վիրավորվել: Մեզ փոխանցեցին, որ  ադրբեջանական կողմն ասել է՝ մեկ օրով դադարեցնել որոնումները, քանի որ աշխատանքներ են կատարում, չեն ուզում մենք՝  որպես թշնամական կողմ, տեսնենք: Նախատեսել էինք գնալ Հադրութի, Ջաբրայիլի ուղղությամբ: Վաղն ենք գնալու»:

Հ. Թադևոսյանն ասաց, որ, ամենյան հավանականությամբ, շինարարական բնույթի աշխատանքներ են իրականացնելու, քանի որ նախորդ օրերին շինանյութերով բեռնված բեռնատարներ էին եկել: