Խորհրդարանն ընդունեց Հակակոռուպցիոն մարմին ստեղծելու մասին և մի շարք այլ օրենքներ

Մեկնարկել է ԱԺ հերթական նիստը։ ԱԺ նախագահ Արարատ Միրզոյանը տեղեկացրեց, որ նախքան օրակարգային հարցերի քննարկումը,  պետք է քվեարկության դրվեն երեկ քննարկված նախագծերը։

Այսպես, Կառավարության կողմից ներկայացված «Հակակոռուպցիոն կոմիտեի» մասին և կից ներկայացված օրենքների նախագծերի փաթեթն առաջին ընթերցմամբ ընդունվեց։ Կողմ էր քվեարկել 84, դեմ՝ 16 և ձեռնպահ՝ 4 պատգամավոր։

Երկրորդ ընթերցմամբ և ամբողջությամբ ընդունվեց նաև «Վարչական իրավախախտումների մասին» օրենսգրքում փոփոխություն կատարելու մասին օրենքի նախագիծը։ Կողմ էր քվեարկել 84, դեմ՝ 24 և ձեռնպահ՝ 2 պատգամավոր։

Կառավարության կողմից ներկայացված մեկ այլ՝ «Հարկային օրենսգրքում» փոփոխություններ և լրացումներ կատարելու մասին օրենքի նախագիծը ևս առաջին ընթերցմաքմբ ընդունվեց։ Կողմ էր 101, դեմ՝ 1 և ձեռնպահ՝ 1 պատգամավոր։

Օրենսդիրն առաջին ընթերցմամբ ընդունեց նաև «Վարչական իրավախախտումների վերաբերյալ» ՀՀ օրենսգրքում փոփոխություն և լրացումներ կատարելու մասին օրենքի նախագիծը։ Կողմ էր 101 և ձեռնպահ՝ 2 պատգամավոր։

«Զենքի մասին» ՀՀ օրենքում լրացումներ կատարելու մասին  օրենքի նախագիծը ևս առաջին ընթերցմամբ ընդունվեց։ Կողմ էր 84 և ձեռնպահ՝ 3 պատգամավոր։

88 կողմ ձայներով ընդունվեց նաև «Ռադիոակտիվ աղբյուրների տեղափոխման հարցերով ԱՊՀ պետությունների տեղեկատվական փոխգործակցության մասին» համաձայնագիրը։