ԱՄՆ-ում հրաձգության արդյունքում հինգ մարդ է զոհվել, որից մեկը հղի կին է եղել

Ինդիանա նահանգի Ինդիանապոլիս քաղաքում հրաձգության հետևանքով զոհվել է հինգ մարդ: «ՌԻԱ նովոստի»-ի փոխանցմամբ, այդ մասին հայտնել է NBC News-ը՝ հղում անելով տեղի իշխանություններին:

Հեռուստաալիքը տեղեկացնում է, որ տեղական ժամանակով ժամը 04:00-ին քաղաքի հյուսիսարևելյան հատվածում ոստիկանությունը հրազենային վնասվածքներով հայտնաբերել է առաջին զոհին: Ավելի ուշ մոտակայքում հայտնաբերվել են այլ զոհերի մարմիններ: Նրանց թվում եղել է հղի կին: Նրան տեղափոխել են հիվանդանոց, բայց բժիշկները չեն կարողացել փրկել ոչ նրան, ոչ էլ երեխային:

Քաղաքապետ Ջո Հոգսեթը հայտարարել է, որ հանցագործությունը զանգվածային սպանության բնույթ ունի: Նրա խոսքով՝ կրակոցները քաղաքում սարսափ են տարածել:

Իր հերթին ոստիկանապետ Ռենդալ Թեյլորը նշել է, որ ներկայում պարզվում է զոհերի միջև կապը: Նա պնդել է, որ միջադեպը պատահական չէ: Հարձակման զոհերի անունները չեն հաղորդվում, դրդապատճառը նույնպես մնում է անհայտ:

Ոստիկանությանը չի հաջողվել պարզել հարձակվողին, հնարավոր է կրակողները մի քանիսն են եղել: