1990-ականները վերադառնալու են, նորից մարդաորսը սկսվելու է. Շուռնուխի գյուղապետ

Կառավարության այսօրվա նիստում որոշում ընդունվեց Սյունիքի մարզի Գորիս համայնքի Շուռնուխ գյուղում բնակելի թաղամաս կառուցելու նպատակով 470 միլիոն դրամ հատկացնել: Շուռնուխի գյուղապետ Հակոբ Արշակյանը Panorama.am-ի հետ զրույցում հույս հայտնեց, որ մինչև տարեվերջ թաղամասը կառուցված կլինի, բանավոր այդպես է ասվել:

Միաժամանակ նա նշեց, որ այս կառավարության հետ հույսեր չի կապում, այլապես իրենց տներն իրենց ձեռքերում կլինեին, սակայն հավատում է խորհրդական Ռոբերտ Ղուկասյանին: Ըստ Հակոբ Արշակյանի՝ նրա մոտ գործը ստացվում է:

Շուռնուխի գյուղապետն ասաց, այս պահին իրենց բնակիչների շրջանում մտավախություն, անհանգստություն չկա. «Մանթրաշ են, թե ինչու այսպես եղավ: Բայց որ ասենք վախում ենք թուրքից, նույնիսկ կանայք, երեխաները, այդպես չէ, թուրքը նստած է իր տեղում, այնպես չէ, որ վախեցնում են, ահաբեկում են»:

Հակոբ Արշակյանը նշեց, որ արդեն գարնանը՝ գյուղատնտեսական աշխատանքներ կատարելիս կամ անասունին արոտավայր տանելիս խնդիրներ կլինեն:

«Հիմա եղանակը ցուրտ է, անասունները հիմնականում գոմերում են: Երբեմն լավ եղանակ է լինում, սակայն էլի չենք հանում: Բայց ամեն դեպքում արդեն գարնանը խոտի պաշարները կվերջանան, պետք է տանել արոտավայրեր, այդ ժամանակ ավելի շատ խնդիրներ կառաջանան:

Անասունները սովորության համաձայն իջնելու են իրենց ամենօրյա տեղը ջուր խմելու, որն արդեն թշնամու վերահսկողության տակ է գտնվում»,- ասաց Շուռնուխի գյուղապետը:

Նա համոզված է, որ 1990-ականները վերադառնալու են, նորից մարդաորսը սկսվելու է: 

«Այնպես չէ, որ չեն արել ու չեն անելու: Դրանցից միշտ էլ պետք է սպասենք դա, քանի որ 90-ականներին եղել են նման դեպքեր»,- ասաց Հակոբ Արշակյանը:

Այս պահին գյուղում մոտ 30 ընտանիք է բնակվում 80 բնակչով: Սահմանների որոշման ժամանակ Շուռնուխից 12 տուն անցել է թշնամու վերահսկողության տակ, այդ տների բնակիչները տարբեր տեղերում են հաստատվել: Հ. Արշակյանը նշեց, որ միայն երեք ընտանիք, որոնք տան խնդիր են ունեցել, Գորիսում ու Կապանում են ժամանակավոր հաստատվել, մինչև հարցը լուծվի:

Ըստ նրա՝ գյուղում կյանքը բնականոն շարունակվում է, ժողովուրդը պետք է համակերպվի այս իրավիճակին:

«Մեզ մոտից տեսնում ենք թշնամուն, իրենց տեղերում նստած մնում են: Ուղղակի տհաճ երևույթ է, որ դուրս ենք գալիս ու իրենց տեսնում»,- ասաց Շուռնուխի գյուղապետ Հակոբ Արշակյանը: