Պուտինն ու Էրդողանը քննարկել են Լեռնային Ղարաբաղի շուրջ իրավիճակը

Ռուսաստանի նախագահ Վլադիմիր Պուտինը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ: Երկու կողմերն ընդգծել են տարբեր ոլորտներում ռուս-թուրքական փոխշահավետ կապերն էլ ավելի ընդլայնելու իրենց դիրքորոշումը: Առաջնահերթությունների թվում են էներգետիկայի ոլորտում խոշոր նախագծերի իրականացումը: Այս մասին հայտնում է Կրեմլը։

Նշվում է, որ քննարկվել են կորոնավիրուսային վարակի տարածման դեմ պայքարում համագործակցության զարգացման հեռանկարները՝ ներառյալ հնարավոր մատակարարումները և Թուրքիայում ռուսական պատվաստանյութերի արտադրության կազմակերպումը։

Պուտինն ու Էրդողանը շարունակել են քննարկումները՝ Լեռնային Ղարաբաղի շուրջ իրավիճակը՝ Ռուսաստանի, Ադրբեջանի և Հայաստանի ղեկավարների 2020 թ. նոյեմբերի 9-ի և 2021 թ. հունվարի 11-ի հայտարարություններում արձանագրված համաձայնագրերի կատարման համատեքստում:

«Սա նշանակում է Ռուսաստանի և Թուրքիայի գործողությունների համակարգում` ի շահ տարածաշրջանի սոցիալ-տնտեսական զարգացման: Գոհունակություն են հայտնել հրադադարի ռեժիմի վերահսկման ռուս-թուրքական միացյալ կենտրոնի աշխատանքների մեկնարկի կապակցությամբ»,-ասվում է Կրեմլի հաղորդագրության մեջ:

Կողմերն անդրադարձ են կատարել նաև սիրիական կարգավորման թեմային: Իդլիբ նահանգում իրավիճակը կայունացնելու Ռուսաստանի և Թուրքիայի ջանքերի լույսի ներքո՝ նրանք հաստատել են իրենց փոխադարձ նվիրվածությունը Սիրիայում հաստատված միջազգային ահաբեկչական խմբավորումների դեմ անզիջում պայքարին:

Նշվել է մտադրությունը՝ հետագա աջակցությունը միջսիրիական քաղաքական գործընթացին, այդ թվում՝ Աստանայի ձևաչափի շրջանակներում: Բացի այդ, Վլադիմիր Պուտինը և Ռեջեփ Թայիփ Էրդողանը նշել են, որ կարևոր է ՄԱԿ-ի օժանդակությամբ Լիբիայի անցումային իշխանությունների ձևավորումը` երկրում երկարաժամկետ կարգավորում ապահովելու համար:

Ռուսաստանի նախագահը ցավակցություն է հայտնել Թուրքիայի ղեկավարին `Իրաքում վերջերս Թուրքիայի Հանրապետության 13 քաղաքացիների մահվան կապակցությամբ: Պայմանավորվածություն է ձեռք բերվել հետագա շփումների վերաբերյալ:

Նշենք, որ նախօրեին ՌԴ ԱԳ նախարար Սերգեյ Լավրովը ևս հեռախոսազրույց էր ունցել իր պաշտոնակից Մևլութ Չավուշօղլուի հետ։