Լուկաշենկո. Կորոնավիրուսի դեմ բելառուսական պատվաստանյութը երկրում կհայտնվի աշնանը

Բելառուսի նախագահ Ալեքսանդր Լուկաշենկոն հայտարարել է Բելառուսում կորոնավիրուսային վարակի նվազման մասին և հույս հայտնել, որ մինչև աշուն երկրում կհայտնվի սեփական պատվաստանյութը: Այս մասին նա ասել է երկուշաբթի օրը Ռուսաստանի նախագահ Վլադիմիր Պուտինի հետ հանդիպմանը, փոխանցում է «ՏԱՍՍ»-ը։

«Սա նաև Ձեր թեման է։ Դուք արդեն գրանցել եք երեք պատվաստանյութ, իսկ մեր առաջին պատվաստանյութը դեռ մշակման փուլում է», - նշել է Լուկաշենկոն։

Ըստ նրա, այժմ Բելառուսը ակտիվորեն պատվաստանյութ է գնում Ռուսաստանից, իսկ դրա զարգացումը Ռուսաստանի Դաշնությունում խոսում է ռուսական գիտության բարձր մակարդակի մասին:

«Ամենաարդյունավետ պատվաստանյութը ռուսականն է: Այն ճանաչված է ամբողջ աշխարհում», - ավելացրել է Լուկաշենկոն:

Նախագահը նշել է նաև, որ Բելառուսում կորոնավիրուսային հիվանդության դեպքերի մակարդակը սկսել է կտրուկ նվազել:

«Բարեբախտաբար, դեպքերը կտրուկ անկում են ապրում, Աստված տա, մինչ ամառ կամ աշուն մենք մոտենանք զրոյին», - ասել Լուկաշենկոն: