Զոհված զինծառայողների աճյունների և անհետ կորածների որոնողական աշխատանքները վերսկսել են

Արցախի ՆԳ նախարարության արտակարգ իրավիճակների պետական ծառայության փրկարարական ջոկատներն այսօր զոհված զինծառայողների աճյունների և անհետ կորած զինծառայողների որոնողական աշխատանքները վերսկսել են 4 ջոկատով՝ Հադրութի շրջանում, Վարանդայի (Ֆիզուլի) և Ջրականի (Ջեբրայիլ) ուղղություններում:

«Ռուսական կողմի հետ բանակցությունների արդյունքում այսօր թույլտվություն արդեն ստացանք փրկարար-որոնողական աշխատանքներ կատարել Արցախի վերահսկողությունից դուրս գտնվող բնակավայրերում և ջոկատներն արդեն անցել են աշխատանքի»,- Panorama.am-ին ասաց արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը:

Նա նշեց, որ, փաստորեն, իրենց ենթադրությունները ճիշտն էին՝ Ադրբեջանն այդ տարածքներում  աշխատանքներ էր կատարում, դրա համար չէր թողում որոնողական աշխատանքներ իրականացնել:

Փետրվարի 15-ից որոնումները դադարեցվել էին ադրբեջանական կողմի պահանջով:

Զինադադարից հետո՝ 2020 թվականի նոյեմբերի 13-ից առ այսօր, որոնումների արդյունքում հայտնաբերվել են 1485 զոհված զինծառայողի (ռազմագործողությունների մասնակից) և քաղաքացիական անձանց աճյուններ: