Պեսկով. Փաշինյանի հրաժարականի որոշումը չի պահանջում անհապաղ զրույց Պուտինի հետ

Հայաստանի վարչապետ Նիկոլ Փաշինյանի՝ ապրիլին հրաժարական տալու որոշումը չի պահանջում անհապաղ զրույց Ռուսաստանի նախագահ Վլադիմիր Պուտինի հետ: Այս մասին այսօր լրագրողներին ասել է ՌԴ նախագահի մամուլի քարտուղար Դմիտրի Պեսկովը: Նա ավելացրել է, որ ղեկավարների շփումները շարունակական են, գրում է Tass-ը։

«Նա [Փաշինյանը] կշարունակի կատարել [Հայաստանի վարչապետի] պարտականությունները, ուստի այս որոշումը, որը հրապարակվեց, անհապաղ քննարկման կարիք չունի», - ասել է Կրեմլի խոսնակը:

Նա ավելացրել է, որ երկու երկրների ղեկավարները «բավականին վերջերս են շփվել, շփումները շարունակվում են»:

Նշվում է, որ Հայաստանում քաղաքական ճգնաժամը սկսվեց փետրվարի վերջին, երբ Գլխավոր շտաբի պետի պաշտոնը զբաղեցրած Օնիկ Գասպարյանը և բարձրագույն հրամանատարական կազմը պահանջեցին Փաշինյանի հրաժարականը: Մարտի 18-ին, Փաշինյանը, նախագահ Արմեն Սարգսյանի և խորհրդարանական երեք խմբակցությունների ղեկավարների հետ խորհրդակցելուց հետո, հայտարարեց, որ արտահերթ խորհրդարանական ընտրությունները տեղի կունենան հունիսի 20-ին: