Մերկելը Պուտինին հորդորում է նվազեցնել Ռուսաստանի ռազմական ներկայությունը Ուկրաինայի սահմանների մոտ

Գերմանիայի կանցլեր Անգելա Մերկելը Ռուսաստանի նախագահ Վլադիմիր Պուտինի հետ հեռախոսազրույցի ընթացքում պահանջել է կրճատել Ռուսաստանի ռազմական ներկայությունը Ուկրաինայի սահմանների մոտ, փոխանցում է «Գազետա.ռու»-ն՝ հղում կատարելով Գերմանիայի նախարարների կաբինետի ներկայացուցիչ Ուլրիկա Դեմմերի հայտարարությանը։

«Զրույցի թեման, ի միջի այլոց, Ռուսաստանի ռազմական ներկայության ավելացումն էր Ուկրաինայի արևելքում: Կանցլերը պահանջել է հրաժարվել զորքերի այս ուժեղացումից՝ դեէսկալացիային հասնելու համար», - ասել է Դեմմերը: Ավելի վաղ հաղորդվել էր, որ Պուտինն ու Մերկելը քննարկել են Կիևի սադրիչ գործողությունները Դոնբասում:

Դրանից առաջ հայտնի էր դարձել, որ ԱՄՆ-ի, Կանադայի, Լիտվայի, Լեհաստանի և Մեծ Բրիտանիայի ներկայացուցիչները հանդիպում են անցկացրել և քննարկել Ռուսաստանի ենթադրյալ «ռազմական գործունեության աճը» Ուկրաինայի սահմանների մոտ: Հանդիպումը, որին մասնակցում էին Միացյալ Նահանգների Պաշտպանության փոխնախարարի քաղաքական հարցերով տեղակալ Ամանդա Դորին և ՆԱՏՕ-ի անդամ այս երկրների գործընկերները, անցկացվել էր առցանց: