Լուկաշենկոն կայցելի Ադրբեջան

Բելառուսի նախագահ Ալեքսանդր Լուկաշենկոն երեքշաբթի օրը՝ ապրիլի 13-ին, կայցելի Ադրբեջան՝ բանակցելու նախագահ Իլհամ Ալիևի հետ։ Այս մասին գրում է Gazeta-ն՝ հղում անելով Բելառուսի ղեկավարի մամուլի ծառայությանը:

«Ապրիլի 13-ին Բելառուսի նախագահ Ալեքսանդր Լուկաշենկոն կայցելի Ադրբեջան: Երկօրյա ծրագիրը ենթադրում է բանակցությունների հարուստ օրակարգ: Մասնավորապես, Բելառուսի պետության ղեկավար Ալեքսանդր Լուկաշենկոն և Ադրբեջանի նախագահ Իլհամ Ալիևը երկու հանդիպում կանցկացնեն», - հայտնել է մամուլի ծառայությունը:

Բելառուսի և Ադրբեջանի ղեկավարների առաջին հանդիպումը տեղի կունենա Բաքվում ՝ Լուկաշենկոյի ժամանումից անմիջապես հետո՝ ոչ ֆորմալ մթնոլորտում: Այս հանդիպման ընթացքում Ալիևը և Լուկաշենկոն կքննարկեն ադրբեջանա-բելառուսական հարաբերությունների հիմնական ուղղությունները և Ադրբեջանի և Բելառուսի միջև համագործակցության ռազմավարական հարցեր:

«Բանակցությունների պաշտոնական մասը նախատեսված է չորեքշաբթի օրը: Նախագահների հանդիպումը կանցկացվի նեղ և ընդլայնված ձևաչափով՝ պատվիրակությունների անդամների մասնակցությամբ», - հայտնել են Բելառուսի նախագահի մամուլի ծառայությունից:

Երկու հանդիպումների հիմնական թեմաները կլինեն երկրների միջև առևտուրը, ինչպես նաև գիտությունը, առողջապահությունը, զբոսաշրջությունը և կրթությունը: