Երիտասարդ հայ կինոգործիչների ֆիլմերը միջազգային կինոհարթակներում ունեցել են նվաճումներ. Շուշանիկ Միրզախանյան

«Ազգային կինոկենտրոնը վերջին տարիներին մեծ ուշադրություն է դարձնում պետական բյուջեից ֆինանսների տրամադրմանը հենց դեբյուտանտների պրոեկտներին»,- ասուլիսում ասաց Հայաստանի ազգային կինոկենտրոնի տնօրեն Շուշանիկ Միրզախանյանը:

Նա նշեց, որ իրենց բյուջեի 40 տոկոսից ավելին հատկացվում է նոր սերդնի, սկսնակ կինոգործիչների ֆիլմերին:

«Ի ուրախություն մեզ, վերջին տարիներին այդ ֆիլմերը շատ լուրջ միջազգային կինոահարթակներում ունեցել են նվաճումներ և ուզում եմ առանձնացնել ռեժիսոր Նորա Մարտիրոսյանի «Երբ որ քամին հանդարտվի» ֆիլմը, որը ներկայացվել էր Կաննի միջազգային կինոփառատոնում, ընդգրվել հիմնական մրցութային ծրագրում»,- ասաց Շ. Միրզախանյանը:

Նա ներկայացրեց ապրիլի 16-ին՝ «Հայ կինոյի օրը» նախատեսված ծրագիրը. այդ օրը  բոլոր կինոթատրոնները ցուցադրելու են հայկական հին ու նոր բազմաժանար ֆիլմեր՝ նշանավորելով Հայ կինոյի ծնունդը։ 

Շ. Միրզախանյանը հայտնեց, որ հունիսի 17-ից «Մոսկվա» կինոթատրոնի հետ սկսելու են նոր ծրագիր մանուկների համար. մինչև տարեվերջ ամեն շաբաթ և կիրակի ներկայացվելու են մանկական անիմացիոն ֆիլմեր: Նա նշեց, որ կոչ են արել մարզերում էլ ցուցադրություններ կազմակերպել, և տարբեր մարզերից սիրով միացել են: