Ռուս սակրավորներն ականազերծում են Մարտակերտի շրջակայքի գյուղատնտեսական նշանակության հողերը

Ռուսաստանի խաղաղապահ զորախմբի մարդասիրական ականազերծման վաշտի ինժեներա-սակրավորական խմբերը շարունակում են Արցախի տարածքը մաքրել ականներից և պայթուցիկ այլ ռազմամթերքից: Այդ մասին ասվում է ՌԴ ՊՆ պաշտոնական կայքէջում տեղադրված հաղորդագրության մեջ:

Ներկայումս ռուս զինծառայողներն ակտիվորեն պայթուցիկ առարկաներ են որոնում Մարտակերտ քաղաքի մատույցներում: Այստեղ՝ գյուղատնտեսական նշանակության հողերի վրա, ռազմական գործողությունների ընթացքում տեղակայված են եղել հրետանային դիրքերը: Այս պահին տեղի բնակիչները չեն կարողանում վերսկսել գյուղատնտեսական աշխատանքները, քանի դեռ չի ավարտվել տարածքի ամբողջական մաքրում:

Վերջին մի քանի օրվա ընթացքում Մարտակերտի շրջանի տարածքում ռուս սակրավորների կողմից հայտնաբերվել և վնասազերծվել է ավելի քան 50 խոշոր տրամաչափի արկ և պայթուցիկ առարկա:

Ընդհանուր առմամբ, 2020 թվականի նոյեմբերի 23-ից ի վեր, Ռուսաստանի խաղաղապահ զորախմբի մարդասիրական ականազերծման ստորաբաժանման զինծառայողները չպայթած ռազմամթերքից մաքրել են 1960 հա տարածք, 605 կիլոմետր ճանապարհ, 1692 շենք, այդ թվում ՝ 30 սոցիալական նշանակության օբյեկտ: Հայտնաբերվել և վնասազերծվել են 25 484 պայթուցիկ առարկա: