«Հրապարակ». ԿԲ-ն ինտերվենցիա է արել. Դոլարի կուրսը էապես նվազել է

«Հրապարակ» թերթը գրում է. «Երեկ դոլարի կուրսն էապես նվազեց. եթե նախօրդ օրերին հասել էր ընդհուպ 540-ի, ապա մեկ օրում իջավ մինչև 1 դոլարի դիմաց 515 դրամ։ Պարզվեց, սա Կենտրոնական բանկի միջամտության արդյունք է։ ԿԲ-ից մեզ ասացին՝ ինտերվենցիա են արել, այսինքն՝  հավելյալ դոլար են բաց թողել շուկա, որը ոչ միայն զսպել է դոլարի բարձրացումը, այլև նպաստել դրամի որոշ ժամանակով արժևորմանը։

Այդ մասին, ի դեպ, ապրիլի 8-ին հայտարարել էր նաև Կենտրոնական բանկը, որ «ՀՀ ֆինանսական շուկաների բնականոն գործունեության ապահովման նպատակով ՀՀ կենտրոնական բանկը ՀՀ արտարժութային շուկայում կիրականացնի գործառնություններ»։

Սա, ըստ էության, ԿԲ-ի միակ ու հիմնական գործառույթն է՝ դրամի արժեզրկումը զսպելու համար, իսկ թե որքան ռեսուրս ունի ԿԲ-ն, դեռ որքան կարող է դոլարի ինտերվենցիաներ իրականացնելով զսպել դրամի արժեզրկումը, դժվար է ասել։ ԿԲ-ից էլ դժվարացան միանշանակ պատասխանել, ասացին՝ դա ավելի խոր փորձագիտական վերլուծություն է պահանջում»։

Մանրամասները թերթի այսօրվա համարում