Պուտինն ու Ասադը պայմանավորվել են Սիրիային Sputnik V առաքելու շուրջ

Ռուսաստանի նախագահ Վլադիմիր Պուտինը և Սիրիայի առաջնորդ Բաշար ալ-Ասադը երկուշաբթի, ապրիլի 26-ին կայացած հեռախոսազրույցի ընթացքում քննարկել են Սիրիա կորոնավիրուսի դեմ ռուսական պատվաստանյութի մատակարարման հարցը: Այս մասին հաղորդվում է Կրեմլի պաշտոնական կայքէջում:

Հաղորդագրության մեջ նշվում է, որ պետությունների ղեկավարները քննարկել են նաև երկկողմ օրակարգի արդիական հարցեր, մասնավորապես`առևտրատնտեսական և հումանիտար կապերի հետագա զարգացման հեռանկարները:

Ասադը Պուտինին պատմել է նաև արաբական հանրապետությունում մայիսին նախատեսված նախագահական ընտրությունների նախապատրաստական աշխատաքների մասին:

«Սիրիայի նախագահը խորին երախտագիտություն է հայտնել Ռուսաստանին սիրիացի ժողովրդին ցուցաբերած բազմակողմանի աջակցության և օգնության համար», - ասված է հայտարարության մեջ:

Այս տարվա փետրվարին Սիրիայում գրանցվել է ռուսական Sputnik V կորոնավիրուսի պատվաստանյութը:

Ռուսական պատվաստանյութի օգտագործումն արդեն հաստատվել է Բելառուսում, Վենեսուելայում, Թուրքմենստանում, Հունգարիայում, Արաբական Միացյալ Էմիրություններում, Ղազախստանում, Ուզբեկստանում և այլ երկրներում: Ընդհանուր առմամբ, ցուցակում ընդգրկված են ավելի քան 60 պետություն: