Թշնամին մեր ամբողջ գյուղի արոտավայրը մտել է, ասում են՝ փախեք ստեղից, գնացեք. Խոզնավարցիները մտահոգ են

Սյունիքի մարզ Տեղ խոշորացված համայնքի Խոզնավար գյուղի բնակիչները մտահոգ են՝ թշնամին ընդամենը 2 կմ հեռավորության վրա է:

Զանգեզուր TV –ն գրում է, որ խոզնավարցիները առաջին հերթին զենք են պահանջում պաշտպանվելու համար։ Բնակիչներից մեկի խոսքով, երբ իմացել են, որ թշնամին Սև լճի տարածքում կրկին խախտելով Հայաստանի սահմանը առաջ է եկել, մի ժամվա ընթացքում գյուղից տարհանել են կանանց և երեխաներին։

«Մեր ամբողջ գյուղի տարածքը, արոտավայրը մտել են, եկել են, ասում են՝ փախեք ստեղից, գնացեք»,- նշում է գյուղի բնակիչներից մեկը: 

«Մարդ չմնաց գյուղում: Մարդիկ տարիներով տանջվել են, քարը քարի վրա են դրել, տանջանքով երկու հատ անասուն են պահել, որ այսօր բերեն ու ու սենց հարամցնե՞ն ժողովրդի գլխին: Այսօր իշխանությունը պատասխան չի տալիս սրա մասին»,- ասում է Խոզնավարի բնակիչներից մեկը:

Մյուսը շարունակում է. «Մեր գյուղի խմելու ջուրը, որտեղից գալիս է, հիմա այդտեղ կանգնած է թուրքը: Այդ ջուրը էլ չենք խմում, ուրիշ տեղից ենք բերում: Լրիվ մտածում են այստեղից գնալու մասին»:

Խոզնավարցիների մտահոգությունները՝ Զանգեզուր TV-ի տեսանյութում: