Կանադայի ԱԳ նախարարը Լավրովին․ Շարունակելու ենք աջակցել ԵԱՀԿ Մինսկի խմբին՝ ԼՂ հակամարտության մշտական կարգավորման գործընթացում

Կանադայի արտաքին գործերի նախարար Մարկ Գառնոն նախօրեին Արկտիկայի խորհրդի նախարարների հանդիպմանը զրուցել է իր ռուս գործընկեր Սերգեյ Լավրովի հետ:

Նախարար Գառնոն վերահաստատել է, որ Կանադան վճռականորեն սատարում է Արկտիկայի խորհրդի աշխատանքին, վերահաստատել է Կանադայի միանշանակ դատապարտումը՝ Ռուսաստանի կողմից Ղրիմ անօրինական ներխուժման ու բռնակցման հետ կապված, մտահոգություն հայտնել Ուկրաինայի տարածքում և նրա շրջակայքում Ռուսաստանի ապակայունացնող վերջին գործողությունների կապակցությամբ: Այս մասին ասվում է Կանադայի ԱԳՆ հայտարարության մեջ։

Կանադայի ԱԳՆ-ն նշում է, որ նախարար Գառնոն և նախարար Լավրովը քննարկել են Լեռնային Ղարաբաղում տեղի ունեցող զարգացումները:

«Նախարար Գառնոն վերահաստատեց, որ Կանադան շարունակում է կոչ անել Հայաստանին և Ադրբեջանին` թուլացնել լարվածությունը, և հույս է հայտնում, որ կողմերը կարող են նշանակալից գործողություններ իրականացնել` ներառյալ ձերբակալվածների ազատ արձակման ու մահացածների աճյունների վերադարձի առումով, ինչպես նաև բոլոր ենթադրյալ ռազմական հանցագործությունների քննության և դատապարտման, ականազերծման ուղղությամբ համագործակցության հարցում։ Մենք շարունակելու ենք աջակցել Եվրոպայի անվտանգության և համագործակցության կազմակերպության (ԵԱՀԿ) առանցքային դերակատարությանը՝  այս հակամարտության մշտական կարգավորման գործընթացում»,-ասվում է Կանադայի ԱԳՆ հայտարարության մեջ: