ԵԽԽՎ զեկուցողը ողջունում է Ադրբեջանի կողմից հայ գերիների ազատումն ու Հայաստանի կողմից ականային քարտեզների հանձնումը

Հայաստանի և Ադրբեջանի միջև հակամարտության մարդասիրական հետևանքների վերաբերյալ ԵԽԽՎ զեկուցող Փոլ Գավանը (Իռլանդիա) ողջունել է 15 հայ գերիների ազատ արձակման և Ակնայի շրջանում գրեթե 100,000 ականների քարտեզի փոխանցումն Ադրբեջանին:

«Չափազանց կարևոր է քայլեր ձեռնարկել անցյալ տարի վեցշաբաթյա պատերազմի մեջ մտնող այս երկարամյա հակամարտության մարդասիրական հետևանքները նվազեցնելու համար», - ասել է Գավանը:

«Չնայած գերության մեջ մնացած շատ այլ հայեր կան, և չնայած Ակնայից բացի այլ շրջանների ականապատ քարտեզներ կան, այսօր մենք կարող ենք ողջունել, որ երկու կողմերն էլ, տարբեր միջազգային դերակատարների օժանդակությամբ և աջակցությամբ, միասին աշխատել են պատերազմի երկու ամենակարևոր հումանիտար հետևանքների շուրջ որոշ լուծումներ գտնելու համար»,-ասել է զեկուցողը։

Գավանն այցելել էր Հայաստան 2021 թ. մայիսին և նախատեսում է ամռանն այցելել Ադրբեջան`ավարտելու իր զեկույցը Հայաստանի և Ադրբեջանի հակամարտության հումանիտար հետևանքների վերաբերյալ:

Հիշեցնենք, որ հունիսի 12-ին հայտնի դարձավ, որ Փաշինյանը Բաքվին է հանձնել Ակնայի շրջանի ականապատ քարտեզները՝ 97 հազար հակատանկային և հակահետևակային ականների տեղակայման մասին, որի դիմաց Ադրբեջանը Հայաստանին վերադարձրեց ընդամենը 15 ռազմագերի։

Այս փոխանակումն իրականացվել էր ԱՄՆ-ի ու Վրաստանի միջոցով, ինչպես հայտնեցին կառավարությունից։ Գերիները Հայաստան վերադարձան Վրաստանից Հայաստան ցամաքային սահմանով։