ՍԴ-ում մեկնարկում է ընտրությունների արդյունքներն անվավեր ճանաչելու պահանջով քաղաքական 4 ուժի դիմումների դատաքննությունը

Սահմանադրական դատարանում մեկնարկում է հունիսի 20-ին կայացած ԱԺ արտահերթ  ընտրությունների արդյունքներն անվավեր ճանաչելու պահանջով քաղաքական 4 ուժի դիմումների դատաքննությունը:

Ընտրությունների արդյունքներն անվավեր ճանաչելու «Հայաստան» կուսակցությունների դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում որոշել են միավորել ու քննել նույն նիստում։

ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։

Ընտրությունների արդյունքներն անվավեր ճանաչելու պահանջով քաղաքական ուժերի դիմումների դատաքննությանը կմասնակցի նաև «Քաղաքացիական պայմանագիր» կուսակցությունը: Միավորված գործը քննելիս որպես պատասխանող կողմ դատավարությանը ԿԸՀ-ից կմասնակցի ԿԸՀ  նախագահ Տիգրան Մուկուչյանը, ԿԸՀ քարտուղար Արմեն Սմբատյանը  և ԿԸՀ անդամ Նունե Հովհաննիսյանը:

Որպես հարակից պատասխանողներ դատավարությանը ներգրավվել են դատախազությանը, ոստիկանությանը և Հեռուստատեսության և ռադիոյի հանձնաժողովին։

Միավորված գործով զեկուցող է նշանակվել Սահմանադրական դատարանի դատավոր Էդգար  Շաթիրյանը: Միավորված գործի դատաքննությունը կանցկացվի բանավոր ընթացակարգով: