Եթե Փաշինյանը հետևեր օրենքի կանոնին, ՔՊ-ն նույնպես չէր հաղթահարելու շեմը. Արտակ Գաստյանը՝ ՍԴ-ում

«Այս ընտրությունները Հայաստանի պատմության մեջ այնքանով են աննախադեպ, որ փաստացի վարչական ռեսուրսն օգտագործել է և գործող իշխանությունը, և ըստ իշխանության տված տվյալների, նաև հակառակ կողմը»,- Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննության ժամանակ եզրափակիչ ելույթում ասաց «Հայոց հայրենիք» կուսակցության ներկայացուցիչ Արտակ Գալստյանը:

Նա նշեց, որ վարչական ռեսուրսի կիրառումը, ատելության խոսքը լավ չի ազդել ընտրութունների մասնակից այլ կուսակցությունների վրա:

«Վստահ եմ, որ եթե Նիկոլ Փաշինյանը հետևեր օրենքի կանոնին, հրաժարականից հետո չշարունակեր պաշտոնավարել, «Քաղաքացիական  պայմանագիր» կուսակցությունը նույնպես չէր հաղթահարելու շեմը»,- ասաց Ա. Գալստյանը:

Նա նշեց, որ իրենց դիմումում ներկայացված խախտումները համակարգային են:

Արտակ Գալստյանի եզրափակիչ ելույթը՝ ուղիղ եթերում: 

«Հիշեցնենք, որ ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում  միավորել են ու  քննում են նույն նիստում։

ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։

Այս գործով դատաքննությունը սկսվել է հուլիսի 9-ից։